«Արարատ-Արմենիան» պայմանագիր է կնքել ֆրանսիացի կիսապաշտպան Մաքսանս Կարլիեի հետ

Հայաստանի չեմպիոն «Արարատ-Արմենիան» համալրվել է Չեմպիոնների լիգայի որակավորման փուլի մեկնարկից առաջ։ Թիմի նորեկ է դարձել 29-ամյա ֆրանսիացի կիսապաշտպան Մաքսանս Կարլիեն։

Ֆուտբոլիստը հայկական ակումբ է տեղափոխվել ֆրանսիական «Նանսիից», որը հանդես է գալիս Լիգա 2-ում։ Կարլիեն «Լանսի» սան է, սակայն կարիերայի մեծ մասն անցկացրել է Ֆրանսիայի երրորդ դիվիզիոնում։ Նախորդ մրցաշրջանում նա Լիգա 2-ում եղել է «Նանսիի» հիմնական կազմի ֆուտբոլիստներից մեկը, մասնակցել է 27 հանդիպման և կատարել 2 գոլային փոխանցում։

Ֆուտբոլիստի տրանսֆերային արժեքը կազմում է 500 հազար եվրո, իսկ հասակը՝ 186 սմ։ Մաքսանս Կարլիեն պաշտպանողական պլանի կիսապաշտպան է, որը հազվադեպ է աչքի ընկնում արդյունավետ գործողություններով։

«Արարատ-Արմենիան» դեռ պաշտոնապես չի հայտարարել ֆրանսիացի կիսապաշտպանի տրանսֆերի մասին։ Սակայն Կարլիեն արդեն ընդգրկված է թիմի հայտացուցակում Չեմպիոնների լիգայի որակավորման առաջին փուլի՝ լատվիական «Ռիգայի» դեմ դիմակայության համար։ Այսպիսով, նա դարձել է Հայաստանի չեմպիոնի վերջին նորեկը եվրագավաթային մրցարշավի մեկնարկից առաջ։

Ավելի վաղ «Արարատ-Արմենիան» պայմանագիր էր կնքել նաև դարպասապահ Ժոաո Բրավիմի, պաշտպաններ Բրունո Պերեյրայի, Բրունո Ուիլսոնի և Լուսյո Ֆելիպեի, ինչպես նաև հարձակվողներ Սանդրո Լիմայի և Կառլոս Ֆրանսայի հետ։

«Ռիգայի» դեմ առաջին հանդիպումը կկայանա հուլիսի 7-ին Աբովյանում։ Պատասխան հանդիպումը կանցկացվի Լատվիայում։ Զույգի հաղթողը պայքարը կշարունակի Չեմպիոնների լիգայի որակավորման երկրորդ փուլում։