Ադրբեջանում կհնչի Հայաստանի օրհներգը․ Ջանես Նազարյանը դարձավ աշխարհի կրկնակի չեմպիոն

Հայաստանը ներկայացնող հունահռոմեական ոճի ըմբիշ Ջանես Նազարյանը ոսկե մեդալ է նվաճել Ադրբեջանում անցկացվող մինչև 17 տարեկանների աշխարհի առաջնությունում։

Մինչև 71 կգ քաշային կարգի եզրափակիչում Նազարյանը 4։3 հաշվով հաղթել է ռուսաստանցի Ասլան Ձուևին և կարիերայում երկրորդ անգամ դարձել աշխարհի մինչև 17 տարեկանների չեմպիոն։

Հայ ըմբիշը տպավորիչ ելույթ է ունեցել եզրափակիչ տանող ճանապարհին՝ բոլոր նախնական գոտեմարտերում հաղթելով ժամանակից շուտ՝ 34։0 ընդհանուր հաշվով։

Եզրափակիչ գոտեմարտը շատ ավելի բարդ էր։ Նազարյանի մրցակիցը մինչև 65 կգ քաշային կարգում Եվրոպայի չեմպիոնն էր։ Առաջին մրցափուլից հետո հայ ըմբիշը պարտվում էր 1։3 հաշվով, սակայն գոտեմարտի երկրորդ հատվածում կարողացավ միավորներ վաստակել պարտերում և կամային հաղթանակ տոնել։

Եզրափակիչից հետո Նազարյանը Հայաստանի դրոշով պատվո շրջան է կատարել գորգի շուրջ։ Բաքվում ներկա երկրպագուների մի մասը սուլոցներով է դիմավորել հայ մարզիկին, սակայն մրցավարությունը եղել է անաչառ և պատշաճ։

Ջանես Նազարյանի ոսկե մեդալը Հայաստանի հավաքականի երրորդ պարգևն է 2026 թվականի հունահռոմեական ըմբշամարտի մինչև 17 տարեկանների աշխարհի առաջնությունում։ Հայաստանի հավաքականն ունի մեկ ոսկե և երկու բրոնզե մեդալ։