Սպերցյանը Դուբայում բուժզննում կանցնի և կմիանա «Ալ-Ահլիի» ավստրիական ճամբարին
- Հեղինակ: Vahe Hakobyan
- Sportaran
Հայաստանի հավաքականի ավագ Էդուարդ Սպերցյանը մոտակա երկու օրվա ընթացքում Դուբայում բուժզննում կանցնի՝ սաուդյան «Ալ-Ահլի» տեղափոխությունն ավարտին հասցնելուց առաջ։
Բուժզննումից հետո կիսապաշտպանը պետք է անմիջապես մեկնի Ավստրիա, որտեղ անցկացվում է «Ալ-Ահլիի» ուսումնամարզական հավաքը։ Հենց այնտեղ Սպերցյանը կմիանա իր նոր թիմին և կսկսի նախապատրաստվել մրցաշրջանին։
Դուբայ ժամանելուց առաջ հայ ֆուտբոլիստը այցելել էր Երևան։ Սպերցյանը շարունակում է մնալ հայկական ֆուտբոլի ամառային տրանսֆերային պատուհանի գլխավոր հերոսներից մեկը, իսկ նրա տեղափոխությունը Սաուդյան Արաբիա կարող է դառնալ Հայաստանի հավաքականի ֆուտբոլիստների պատմության ամենախոշոր գործարքներից մեկը։
Հիշեցնենք, որ «Ալ-Ահլին» «Կրասնոդարի» հետ համաձայնության է հասել Էդուարդ Սպերցյանի տրանսֆերի շուրջ։ Գործարքի արժեքը կազմում է 25 միլիոն դոլար։ Բուժզննումն անցնելուց հետո կողմերը կկարողանան պաշտոնապես ավարտին հասցնել գործարքը։