Սլավիկ Գալստյանը հաղթեց աշխարհի գործող չեմպիոնին և դուրս եկավ UWW-ի վարկանիշային մրցաշարի կիսաեզրափակիչ

Հունահռոմեական ոճի ըմբիշ Սլավիկ Գալստյանը հաջողությամբ մեկնարկեց Բուդապեշտում անցկացվող UWW-ի վարկանիշային մրցաշարում և դուրս եկավ մինչև 67 կգ քաշային կարգի կիսաեզրափակիչ։

1/8 եզրափակիչում Գալստյանը վստահ հաղթանակ տարավ Գերմանիայի ներկայացուցիչ Քրիստոֆեր Կրամերի նկատմամբ՝ 6:1 հաշվով։

Քառորդ եզրափակիչում հայ ըմբիշի մրցակիցն Ուզբեկստանը ներկայացնող Այթժան Խալմախանովն էր։ Գալստյանը հաղթում էր 5:2 հաշվով, որից հետո մրցակցին պառկեցրեց թիակների վրա և ժամանակից շուտ ավարտեց գոտեմարտը։

Խալմախանովն աշխարհի գործող չեմպիոնն է, ինչպես նաև Ասիայի չեմպիոն, մինչև 20 տարեկանների աշխարհի չեմպիոն և Զագրեբում կայացած վարկանիշային մրցաշարի հաղթող։ Միևնույն ժամանակ ուզբեկ ըմբիշն իր գլխավոր տիտղոսները նվաճել է մինչև 63 կգ քաշային կարգում։

Կիսաեզրափակիչում Սլավիկ Գալստյանը կմրցի Ռուսաստանը ներկայացնող Դինիսլամ Բամմատովի հետ։

Սլավիկ Գալստյանի արդյունքները

1/8 եզրափակիչ. Սլավիկ Գալստյան — Քրիստոֆեր Կրամեր (Գերմանիա)՝ 6:1

1/4 եզրափակիչ. Սլավիկ Գալստյան — Այթժան Խալմախանով (Ուզբեկստան)՝ 5:2, հաղթանակ թիակների վրա