Հրանտ-Լեոն Ռանոսը խփեց իր առաջին գոլը «Տեներիֆեի» կազմում (ՏԵՍԱՆՅՈՒԹ)

Հայաստանի ազգային հավաքականի հարձակվող Հրանտ-Լեոն Ռանոսը խփեց իր առաջին գոլը «Տեներիֆեի» կազմում։ Ֆուտբոլիստը բացեց հաշիվը Իսպանիայի տարածաշրջանային լիգան ներկայացնող «Մարինոյի» դեմ ընկերական խաղում։

Ռանոսը գոլի հեղինակ դարձավ հանդիպման իններորդ րոպեին։ Հայ հարձակվողը հաջող գործեց պրեսինգի ժամանակ, օգտվեց պաշտպանի սխալից և մենապայքարում հաղթեց մրցակցի դարպասապահին։

Հարձակվողը խաղադաշտում անցկացրեց առաջին խաղակեսը, որն ավարտվեց 1։0 հաշվով։ Ընդմիջումից հետո «Տեներիֆեն» ևս հինգ գոլ խփեց և խոշոր հաղթանակ տարավ՝ 6։0։ Հեթ-տրիկի հեղինակ դարձավ հարձակվող Վիկտոր Մորենոն, որը կարող է Ռանոսի մրցակիցը լինել մեկնարկային կազմում տեղի համար պայքարում։

Ռանոսի համար սա նոր թիմի կազմում երկրորդ ընկերական հանդիպումն էր։ Ավելի վաղ նա Մյոնխենգլադբախի «Բորուսիայից» մշտական հիմունքներով տեղափոխվել էր «Տեներիֆե»։

Իսպանական ակումբը շարունակում է նախապատրաստվել Լա Լիգա 2-ի նոր մրցաշրջանին։ «Տեներիֆեն» առաջին պաշտոնական հանդիպումը կանցկացնի օգոստոսի 16-ին՝ «Էյբարի» դեմ։ Մինչև առաջնության մեկնարկը թիմը ևս մի քանի ստուգողական հանդիպում կանցկացնի։ Դրանցից մոտակա խաղը տեղի կունենա հուլիսի 29-ին՝ «Անազայի» դեմ։

ՌԱՆՈՍԻ ԳՈԼԻ ՏԵՍԱՆՅՈՒԹԸ՝