Ֆին Գերագուսյանը «Սանդերլենդի» հիմնական թիմի հետ մեկնել է ԱՄՆ

Հայաստանի ազգային հավաքականի 18-ամյա հարձակվող Ֆին Գերագուսյանն ընդգրկվել է «Սանդերլենդի» հիմնական թիմի կազմում, որը մեկնել է ԱՄՆ՝ մասնակցելու մինչմրցաշրջանային հավաքին։

Անգլիական ակումբը երիտասարդ հարձակվողին ներառել է ԱՄՆ մեկնած 26 ֆուտբոլիստներից բաղկացած նախնական հայտացուցակում։ Ռեժիս Լը Բրիի գլխավորած թիմը մեկ շաբաթ կանցկացնի Թենեսի նահանգի Նեշվիլ քաղաքում, որից հետո մի շարք ընկերական հանդիպումներ կանցկացնի։

«193 սանտիմետր հասակ ունեցող Գերագուսյանը հզոր կենտրոնական հարձակվող է, որը վերջերս ակումբի հետ ստորագրել է իր առաջին պրոֆեսիոնալ պայմանագիրը։ Չնայած երիտասարդ տարիքին՝ նա արդեն ներկայացրել է Հայաստանի ազգային հավաքականը և ԱՄՆ է ժամանել՝ իր տպավորիչ առաջընթացը շարունակելու մտադրությամբ»,- ասվում է «Սանդերլենդի» պաշտոնական կայքում։

Ամերիկյան շրջագայության առաջին հանդիպումը կկայանա հուլիսի 25-ին։ Նեշվիլի «Geodis Park» մարզադաշտում «Սանդերլենդը» կմրցի «Լիվերպուլի» հետ։

Հուլիսի 30-ին անգլիական թիմը Նյու Ջերսիում կհանդիպի «Լիդս Յունայթեդի» հետ, իսկ օգոստոսի 2-ին Փենսիլվանիայում «Ռեքսհեմի» դեմ խաղով կավարտի ԱՄՆ-ում նախատեսված հանդիպումների շարքը։

Ավելի վաղ Գերագուսյանն արդեն նորամուտն էր նշել «Սանդերլենդի» հիմնական թիմում՝ Անգլիայում մասնակցելով «Յորքի» դեմ ընկերական հանդիպմանը։ Այժմ Հայաստանի հավաքականի հարձակվողն առաջին անգամ արտասահմանյան հավաքի է մեկնել ակումբի հիմնական կազմի հետ։