Էլինա Ավանեսյանն ավարտեց ելույթները Համբուրգի WTA 250 մրցաշարում

WTA վարկանիշում 208-րդ տեղը զբաղեցնող հայ թենիսիստուհի Էլինա Ավանեսյանը չկարողացավ դուրս գալ Համբուրգում անցկացվող WTA 250 մրցաշարի եզրափակիչ։

Կիսաեզրափակիչում Ավանեսյանը լարված երեք սեթանոց պայքարում զիջեց աշխարհի 97-րդ ռակետ, հունգարուհի Աննա Բոնդարին։

Առաջին սեթում Էլինան սեփական մատուցման ժամանակ երկու սեթբոլ ուներ, սակայն չկարողացավ իրացնել դրանք և պարտվեց թայ-բրեյքում։ Երկրորդ սեթում հայ թենիսիստուհին երկու անգամ զիջեց սեփական մատուցումը, բայց կարողացավ փոխել հանդիպման ընթացքն ու հավասարեցնել հաշիվը։

Վճռորոշ սեթից առաջ Ավանեսյանը ոտնաթաթի վնասվածքի պատճառով բժշկական ընդմիջում վերցրեց։ Չնայած վնասվածքին՝ նա շարունակեց պայքարը և երրորդ սեթը հասցրեց թայ-բրեյքի, որտեղ Բոնդարն առավելության հասավ 7։2 հաշվով։

Հանդիպումն ավարտվեց հունգարացի թենիսիստուհու հաղթանակով՝ 7։6 (7։3), 4։6, 7։6 (7։2)։

Համբուրգի մրցաշարում Ավանեսյանն ընդհանուր առմամբ չորս հաղթանակ տարավ։ Սա վերջին մեկուկես տարվա ընթացքում նրա առաջին կիսաեզրափակիչն էր WTA մրցաշարերում։