Արտակ Օսեյան. «Մենք հաջորդ փուլ դուրս գալու իրական հնարավորություններ ունենք»
- Հեղինակ: Vahe Hakobyan
- Sportaran
Երևանի «Փյունիկի» գլխավոր մարզիչ Արտակ Օսեյանը մեկնաբանել է Կոնֆերենցիաների լիգայի որակավորման երկրորդ փուլի առաջին խաղում հունգարական «Դեբրեցենից» կրած պարտությունը։
Հունգարիայում կայացած հանդիպումն ավարտվել է տանտերերի՝ 1:0 հաշվով նվազագույն հաղթանակով։ «Փյունիկի» գլխավոր մարզչի խոսքով՝ խաղը հավասար էր, իսկ իր թիմը բավականաչափ գոլային պահեր ստեղծեց պարտությունից խուսափելու համար։
«Կարծում եմ՝ խաղը լիովին հավասար էր։ Ժամանակ առ ժամանակ նախաձեռնությունը մի թիմից անցնում էր մյուսին։ Մենք բազմաթիվ գոլային պահեր ստեղծեցինք և կարող էինք խուսափել պարտությունից։ Ամեն դեպքում, կարծում եմ՝ այս դիմակայությունում թիմերի հնարավորությունները շարունակում են հավասար մնալ՝ 50-50։ Մենք հաջորդ փուլ դուրս գալու իրական հնարավորություններ ունենք»,- ասել է Օսեյանը։
Գլխավոր մարզիչը նաև անդրադարձել է պատասխան հանդիպումից առաջ ֆուտբոլիստների տրամադրվածությանը։
«Խաղից հետո հանդերձարանում ես ֆուտբոլիստների աչքերում ինքնավստահություն տեսա։ Նրանք գիտեն, որ մենք կարող ենք դուրս գալ հաջորդ փուլ»,- հավելել է մասնագետը։
«Փյունիկի» և «Դեբրեցենի» միջև պատասխան հանդիպումը կկայանա հուլիսի 30-ին՝ Երևանում։