Հայկ Խլոյանը դարձավ UWW 2026 վարկանիշային շարքի բրոնզե մեդալակիր Բուդապեշտում

Հայաստանի հունահռոմեական ոճի ըմբիշ Հայկ Խլոյանը նվաճեց բրոնզե մեդալ UWW 2026 վարկանիշային շարքի մրցաշարում, որը անցկացվում է Բուդապեշտում (Հունգարիա)։

Մինչև 97 կգ քաշային կարգում Խլոյանը հաջողությամբ անցկացրեց մրցաշարի առաջին գոտեմարտերը։ 1/8 եզրափակչում հայ ըմբիշը 7:1 հաշվով հաղթեց Ղրղզստանի ներկայացուցիչ Ուզուր Ջուզուպբեկովին։

Քառորդ եզրափակչում Խլոյանը հանդիպեց հունգարացի Ալեքս Սժոկեին։ Գոտեմարտն ավարտվեց 1:1 հաշվով, սակայն լրացուցիչ չափանիշներով հաղթանակը շնորհվեց Սժոկեին։

Սփոփիչ գոտեմարտում Հայկ Խլոյանը վստահ հաղթանակ տարավ գերմանացի Լուկաս Լազոգիանիսի նկատմամբ՝ 4:0 հաշվով, և իրավունք ստացավ պայքարելու բրոնզե մեդալի համար։

Սկզբում նախատեսված էր, որ բրոնզի համար Խլոյանը պետք է մրցեր ռուսաստանցի Մուսա Եվլոևի դեմ, սակայն վերջինս վնասվածքի պատճառով չկարողացավ մասնակցել գոտեմարտին։ Արդյունքում Հայկ Խլոյանը դարձավ Բուդապեշտի UWW վարկանիշային շարքի բրոնզե մեդալակիր։

Նշենք, որ վերջերս Խլոյանը Երևանում անցկացված մրցաշարում արդեն հաղթել էր Եվլոևին՝ 3:2 հաշվով։

Մինչև 97 կգ քաշային կարգի մրցաշարի լավագույն եռյակը՝

1. Ալեքս Սժոկե (Հունգարիա)
2. Իլյա Երմոլենկո (Ռուսաստան)
3. Հայկ Խլոյան (Հայաստան) և Արվի Սավոլայնեն (Ֆինլանդիա)

Եզրափակչում Ալեքս Սժոկեն հաղթեց Իլյա Երմոլենկոյին՝ 6:1 հաշվով։

Բուդապեշտի UWW վարկանիշային շարքում Հայաստանը ներկայացրեցին երկու հունահռոմեական ոճի ըմբիշներ։ Սլավիկ Գալստյանը (67 կգ) զբաղեցրեց 5-րդ տեղը, իսկ Հայկ Խլոյանը (97 կգ) դարձավ բրոնզե մեդալակիր։