Յուրա Մելիքյանը «Բահչեշեհիրի» դեմ խաղաց Եվրագավաթի երկրորդ տուրում

Հայ բասկետբոլիստ Յուրա Մելիքյանը անցկացրեց իր երկրորդ հանդիպումը բասկետբոլի Եվրագավաթի (EuroCup) շրջանակում։

Մրցաշարի երկրորդ տուրում բուլղարական «Բալկան» ակումբը, որի կազմում Մելիքյանը հանդես է գալիս եվրագավաթներում, մրցեց թուրքական «Բահչեշեհիրի» հետ։ Ստամբուլյան թիմը խոշոր հաշվով հաղթանակ տարավ՝ 101:60։

Հայ կենտրոնականը հանդիպումը սկսեց պահեստայինների նստարանից և խաղահրապարակում անցկացրեց մոտ 7 րոպե։ Այդ ընթացքում Մելիքյանը վաստակեց 2 միավոր՝ դաշտից իրացնելով երեք նետումից մեկը, ինչպես նաև կատարեց 1 անդրադարձ։

20-ամյա բասկետբոլիստի համար սա երկրորդ հանդիպումն էր Եվրագավաթի ընթացիկ խաղարկությունում։ Առաջին տուրում գերմանական «Ուլմի» դեմ Մելիքյանը խաղահրապարակում անցկացրել էր 17 րոպե՝ վաստակելով 4 միավոր, կատարելով 8 անդրադարձ և մեկ արդյունավետ փոխանցում։

Նշենք, որ Մելիքյանը «Բալկանի» կազմում հանդես է գալիս միայն եվրագավաթներում, իսկ Բուլղարիայի առաջնությունում կխաղա «Բոտև 2012»-ի կազմում։

Հայ բասկետբոլիստը նոր թիմի կազմում կարող է նորամուտը նշել արդեն հոկտեմբերի 10-ին։ Հետաքրքիր է, որ «Բոտև 2012»-ի առաջին մրցակիցը կլինի հենց «Բալկանը», որի կազմում Մելիքյանը դրանից ընդամենը մի քանի օր առաջ խաղադաշտ էր դուրս եկել Եվրագավաթում։