Նորբերտո Բրիասկո-Բալեկյանի գոլը «Բարրակաս Սենտրալին» դուրս բերեց Կլաուսուրայի քառորդ եզրափակիչ
- Հեղինակ: Vahe Hakobyan
- Sportaran
Հայաստանի հավաքականի հարձակվող Նորբերտո Բրիասկո-Բալեկյանը դարձավ Արգենտինայի առաջնության փլեյ-օֆֆի 1/8 եզրափակչի հանդիպման հաղթական գոլի հեղինակը։ Նրա «Բարրակաս Սենտրալը» հյուրընկալվելիս 1։0 հաշվով հաղթեց «Դեֆենսա ի Խուստիսիային» և դուրս եկավ Կլաուսուրա-2026-ի քառորդ եզրափակիչ։
Հանդիպումը կայացավ նոյեմբերի 21-ին «Նորբերտո Տոմագելո» մարզադաշտում։ Միակ գոլը գրանցվեց 29-րդ րոպեին։ Իվան Տապիայի՝ անկյունայինից կատարած փոխանցումից հետո Բրիասկո-Բալեկյանը հաղթեց պայքարը տուգանային հրապարակում և գլխի դիպուկ հարվածով գնդակն ուղարկեց տանտերերի դարպասը։
Հայ հարձակվողն աչքի ընկավ երկրորդ անընդմեջ խաղում՝ ընթացիկ մրցաշրջանում իր գոլերի թիվը հասցնելով հինգի։
Բալեկյանը «Բարրակաս Սենտրալի» մեկնարկային կազմում էր և խաղադաշտում անցկացրեց 79 րոպե, որից հետո փոխարինվեց։ SofaScore վիճակագրական հարթակը նրա խաղը գնահատեց 7,3 միավորով։
Այս հաղթանակի շնորհիվ «Բարրակաս Սենտրալը» կշարունակի պայքարը չեմպիոնական տիտղոսի համար։ Քառորդ եզրափակչում թիմը կհանդիպի «Ռոսարիո Սենտրալ» – «Խիմնասիա Մենդոսա» դիմակայության հաղթողին։
Մինչդեռ Հայաստանի հավաքականի մեկ այլ ներկայացուցիչ՝ Լուկաս Սելարայանը, արդեն ավարտել է ելույթները Կլաուսուրայում։ Նրա «Բելգրանոն», որը դարձել էր Ապերտուրա-2026-ի չեմպիոն, 1/8 եզրափակչում պարտվեց «Վելես Սարսֆիլդին»։ Հիմնական և լրացուցիչ ժամանակներն ավարտվեցին 2։2 հաշվով, իսկ 11-մետրանոց հարվածաշարում առավելության հասավ «Վելեսը»՝ 3։1։ Սելարայանը չկարողացավ իրացնել իր 11-մետրանոց հարվածը։