Երիտասարդ երկրպագուն Սանկտ Պետերբուրգից եկել էր Սպերցյանի համար, բայց զրկվել է խոստացված մարզաշապիկից

Հայաստանի ազգային հավաքականի և «Կրասնոդարի» ավագ Էդուարդ Սպերցյանը Մոսկվայի «Դինամոյի» դեմ ՌՊԼ-ի 29-րդ տուրի խաղից հետո հայտնվել է հուզիչ պատմության կենտրոնում։

16-ամյա երկրպագու Տիմոֆեյը հատուկ Սանկտ Պետերբուրգից ժամանել էր Մոսկվա՝ աջակցելու հայ կիսապաշտպանին և անձամբ նրան նվեր փոխանցելու համար։ Խաղից առաջ պատանի երկրպագուն հանդիպել էր Սպերցյանին հյուրանոցի մոտ և նրան հանձնել իր նվերը։ Ի պատասխան՝ ֆուտբոլիստը խոստացել էր խաղից հետո Տիմոֆեյին նվիրել իր խաղային մարզաշապիկը։

Եզրափակիչ սուլիչից հետո Սպերցյանն իսկապես մարզաշապիկը նետել է տրիբունա՝ երկրպագուի ուղղությամբ։ Սակայն, ինչպես պատմել է Տիմոֆեյը, այդ պահին սեկտորում հրմշտոց է սկսվել, և մարզաշապիկն ի վերջո հայտնվել է այլ մարդկանց մոտ։

Ավելի ուշ պատանին ֆուտբոլիստին դիմել է սոցիալական ցանցերի միջոցով։

«Էդուարդ, բարի երեկո, իմ անունը Տիմոֆեյ է։ Ես Պիտերից եկել էի ձեր խաղին՝ “Դինամոյի” դեմ, խաղից առաջ գնացել էի ձեր հյուրանոց, ինձնից խլել են քո մարզաշապիկը։ Ընկերներս փորձեցին օգնել, բայց չստացվեց։ Այնտեղ երկու տղամարդ կային, նրանք վերցրին մարզաշապիկը՝ ասելով, թե մենք ենք այն իրենցից գողացել։ Հիմա նստած եմ ձեր հյուրանոցում, շատ կցանկանայի, որ դուք նկատեիք», — գրել է Տիմոֆեյը։

Պատմությունը արագ տարածվել է երկրպագուների շրջանում։ Շատ օգտատերեր աջակցել են Տիմոֆեյին և հույս հայտնել, որ Սպերցյանը կտեսնի պատանի երկրպագուի դիմումն ու կկարողանա կապ հաստատել նրա հետ։

«Դինամոյի» դեմ հանդիպումը «Կրասնոդարի» համար ավարտվել է 1։2 հաշվով պարտությամբ։ Սպերցյանը եղել է մեկնարկային կազմում, աչքի է ընկել գոլային փոխանցմամբ և փոխարինվել երկրորդ խաղակեսում։ Հայ կիսապաշտպանի համար այս ասիստը դարձել է 16-րդը ՌՊԼ-ի ընթացիկ մրցաշրջանում։