Օլիմպիական խաղեր-2028-ի առաջին ուղեգրերը. հինգ երկիր Դոհայում կայացած հրաձգության ԱԱ-ում նվաճեց վեց ուղեգիր

Նոյեմբերի 3-ին Կատարի մայրաքաղաք Դոհայում ընթացող հրաձգության աշխարհի առաջնությունում խաղարկվեցին Լոս Անջելեսում կայանալիք 2028 թվականի Օլիմպիական խաղերի առաջին վեց ուղեգրերը։ Օլիմպիական ուղեգրեր նվաճեցին հինգ երկրների ներկայացուցիչներ՝ Չինաստանի, Հարավային Կորեայի, Ֆրանսիայի, Խորվաթիայի և Սլովակիայի։ Ընդ որում, աշխարհի առաջնության առաջին երկու ոսկե մեդալները նվաճեցին Փարիզ-2024-ի գործող օլիմպիական չեմպիոնները։

Օլիմպիական ուղեգրերի խաղարկության առաջին օրը կայացան տղամարդկանց և կանանց 10 մետրից օդամղիչ հրացանով հրաձգության եզրափակիչները։ Հաղթողներ դարձան չինացի Շեն Լիհաոն և հարավկորեացի Բան Հյո Ջինը, որոնք Փարիզի Օլիմպիական խաղերում տարած հաղթանակներից հետո ևս մեկ անգամ հաստատեցին իրենց բարձր կարգը։

Ո՞ր երկրները նվաճեցին առաջին օլիմպիական ուղեգրերը

Երկու եզրափակիչների արդյունքներով օլիմպիական ուղեգրերը բաշխվեցին հետևյալ կերպ.

• Չինաստան՝ 2 ուղեգիր (տղամարդիկ և կանայք)։

• Հարավային Կորեա՝ 1 ուղեգիր (կանայք)։

• Ֆրանսիա՝ 1 ուղեգիր (կանայք)։

• Խորվաթիա՝ 1 ուղեգիր (տղամարդիկ)։

• Սլովակիա՝ 1 ուղեգիր (տղամարդիկ)։

Կանանց մրցումներում Բան Հյո Ջինը հաղթեց՝ հավաքելով 253,1 միավոր։ Արծաթե մեդալը նվաճեց չինացի Հան Ցզյայուն (252,2), իսկ բրոնզե մեդալը՝ նրա հայրենակից Վան Ցզիֆեյը (231,0)։

Տղամարդկանց պայքարում աշխարհի չեմպիոն դարձավ Շեն Լիհաոն՝ 254,1 միավոր արդյունքով։ Երկրորդ տեղը զբաղեցրեց Չինաստանի մեկ այլ ներկայացուցիչ Մա Սիհանը (253,1), իսկ երրորդը՝ խորվաթ Միран Մարիչիչը (229,9)։

Տեսեք նաև մրցումային օրվա արդյունքները։

Ինչո՞ւ օլիմպիական ուղեգրեր ստացան նաև մրցանակային տեղեր չզբաղեցրած մարզիկները

Օլիմպիական որակավորման առանձնահատկություններից մեկն այն է, որ աշխարհի մեկ առաջնության ընթացքում յուրաքանչյուր երկիր կարող է նվաճել առավելագույնը մեկ ուղեգիր յուրաքանչյուր անհատական մրցաձևում։

Այդ պատճառով կանանց եզրափակիչում օլիմպիական ուղեգիրը բաժին հասավ չորրորդ տեղը զբաղեցրած ֆրանսուհի Օսեան Մյուլլերին։ Նմանատիպ իրավիճակ գրանցվեց նաև տղամարդկանց մրցումներում, որտեղ վեցերորդ տեղը զբաղեցրած Պատրիկ Յանին Սլովակիայի համար ապահովեց օլիմպիական ուղեգիր։

Միևնույն ժամանակ, օլիմպիական քվոտաները տրամադրվում են ազգային օլիմպիական կոմիտեներին, այլ ոչ թե անմիջապես մարզիկներին։

Արտյոմ Գրիգորյանը զբաղեցրեց 20-րդ տեղը

Տղամարդկանց որակավորման փուլում հանդես եկավ Հայաստանի ներկայացուցիչ Արտյոմ Գրիգորյանը։ Նա հավաքեց 629,5 միավոր և 107 մասնակիցների շրջանում զբաղեցրեց 20-րդ տեղը։

Եզրափակչի ութնյակ մտնելու համար հայ հրաձիգին չբավարարեց 2,7 միավոր։ Այսպիսով, Գրիգորյանին չհաջողվեց Հայաստանի համար օլիմպիական ուղեգիր նվաճել։

Դոհայում դեռ կխաղարկվի ևս 30 օլիմպիական ուղեգիր

Հրաձգության աշխարհի առաջնությունն անցկացվում է նոյեմբերի 1-14-ը։ Մրցաշարում ընդհանուր առմամբ նախատեսված է խաղարկել 36 օլիմպիական ուղեգիր՝ 12 անհատական մրցաձևերում, յուրաքանչյուրում՝ երեքական։

Առաջին երկու եզրափակիչներից հետո դեռևս չբաշխված է 30 ուղեգիր։ Հաջորդ երեք ուղեգրերը կխաղարկվեն նոյեմբերի 4-ին՝ տղամարդկանց 25 մետրից արագաձիգ ատրճանակով հրաձգության մրցումներում։

Դոհայում անցկացվող աշխարհի առաջնությունը հրաձգության առաջին օլիմպիական որակավորման մրցաշարն է Լոս Անջելեսում կայանալիք 2028 թվականի Օլիմպիական խաղերի ճանապարհին։