Հայաստանում առաջին անգամ անցկացվել է օդապարիկային սպորտի բաց առաջնություն

2026 թվականի հոկտեմբերի 5-ից 11-ը Ապարանի ջրամբարի շրջակայքում անցկացվել է Հայաստանի պատմության մեջ օդապարիկային սպորտի առաջին բաց առաջնությունը։ Մրցաշարը կազմակերպել էր Հայաստանի օդապարիկային սպորտի ֆեդերացիան՝ FAI/CIA միջազգային մարզական կանոնների համաձայն։ Առաջնությանը մասնակցել է 14 օդաչու։

Մասնակիցները պետք է կատարեին 15 մրցակցային առաջադրանք, որոնց ընթացքում գնահատվում էին օդապարիկի կառավարման ճշգրտությունը, մարտավարական մտածողությունը և եղանակային պայմաններն արդյունավետ օգտագործելու կարողությունը։

Հայաստանի ներկայացուցիչների շրջանում լավագույն արդյունքը գրանցել է Նաիրի Բարսեղյանը, որը վաստակել է 10 209 միավոր և ընդհանուր հաշվարկում զբաղեցրել չորրորդ տեղը։ Բրոնզե մեդալին հասնելու համար նրան չի բավականացրել ընդամենը 156 միավոր։

Հատկանշական է, որ Բարսեղյանը ոչ միայն գործող օդաչու է, այլև Հայաստանի օդապարիկային սպորտի ֆեդերացիայի հիմնադիրն ու նախագահը։ Հենց նրա ղեկավարած ֆեդերացիան է կազմակերպել պատմական այս մրցաշարը։

Պատվո հարթակի բոլոր երեք տեղերը զբաղեցրել են Ռուսաստանի ներկայացուցիչները։ Հայաստանի առաջին բաց առաջնության հաղթող է դարձել Իվան Մենյայլոն, արծաթե մեդալը նվաճել է Ելիզավետա Վերտպիրխանովան, իսկ բրոնզե մեդալը՝ Մարկ Ստեննը։

Հաջողությամբ են հանդես եկել նաև Բրազիլիայից ժամանած հայկական սփյուռքի ներկայացուցիչները։ Մարկուս Կալուսդյանը զբաղեցրել է հինգերորդ տեղը՝ անմիջապես Բարսեղյանից հետո։ Նրա եղբայրը՝ Քրիստիան Կալուսդյանը, մրցաշարն ավարտել է յոթերորդ, իսկ քույրը՝ Ալին Կալուսդյանը՝ ութերորդ տեղում։

Հայաստանի օդապարիկային սպորտի առաջին բաց առաջնության արդյունքները

1. Իվան Մենյայլո (Ռուսաստան)

2. Ելիզավետա Վերտպիրխանովա (Ռուսաստան)

3. Մարկ Ստենն (Ռուսաստան)

4. Նաիրի Բարսեղյան (Հայաստան)

5. Մարկուս Կալուսդյան (Բրազիլիա)

6. Գեորգի Զիմենկո (Ռուսաստան)

7. Քրիստիան Կալուսդյան (Հայաստան)

8. Ալին Կալուսդյան (Հայաստան)

9. Արմեն Բենյամինով (Հայաստան)

10. Բազիլ Դավիդյուկ (Լեհաստան)

11. Դոմինիկ Բարեֆորդ (Մեծ Բրիտանիա)

12. Արտյոմ Բոնդարենկո (Ռուսաստան)

13. Ինգա Վան Հավեր (Լատվիա)

14. Վարադան Վարդանյան (Հայաստան)

Հայաստանի օդապարիկային սպորտի առաջին բաց առաջնության անցկացումը կարևոր իրադարձություն է այս մարզաձևի զարգացման համար։ Մրցաշարը ցույց է տվել միջազգային մակարդակի մրցումներ կազմակերպելու Հայաստանի ներուժը և հայ օդաչուներին հնարավորություն է տվել փորձարկել իրենց ուժերը արտասահմանցի փորձառու մասնակիցների հետ պայքարում։