Հայաստանի հավաքականը հաղթեց Ադրբեջանին Բիլի Ջին Քինգի գավաթում

Հայաստանի կանանց թենիսի հավաքականը հաջող մեկնարկեց Բիլի Ջին Քինգի գավաթի խաղարկությունում։ Սան Մարինոյում ընթացող երրորդ խմբի առաջին տուրում Հայաստանի հավաքականը 3։0 հաշվով վստահ հաղթանակ տարավ Ադրբեջանի հավաքականի նկատմամբ։

Մենախաղերում Հայաստանի թիմին հաղթանակներ պարգևեցին Անի Ամիրաղյանն ու Էլինա Ավանեսյանը։ Ամիրաղյանը մրցակցին ոչ մի շանս չտվեց՝ հաղթելով 6։0, 6։0 հաշվով։ Ավանեսյանը նույնպես վստահ անցկացրեց իր հանդիպումը և հաղթեց 6։3, 6։2 հաշվով։

Էլինա Ավանեսյանի համար այս հանդիպումը դարձավ նորամուտ Հայաստանի հավաքականի կազմում։

Զուգախաղում Մարիա Ազիզյանն ու Ալինա Սողոմոնյանը ամրապնդեցին Հայաստանի հավաքականի հաջողությունը՝ հաղթելով 6։2, 6։1 հաշվով։

Հայաստանի հավաքականը հաջորդ հանդիպումը կանցկացնի հունիսի 18-ին Ալբանիայի դեմ, իսկ հունիսի 19-ին կմրցի Չեռնոգորիայի հետ։