«Նոան» սկսել է սեփական մարզադաշտի կառուցման նախապատրաստական աշխատանքները. ներդրվել է 130 միլիոն դրամ
- Հեղինակ: Vahe Hakobyan
- Sportaran
Ֆուտբոլային «Նոա» ակումբը հայտնել է ապագա մարզադաշտի կառուցման համար նախատեսված տարածքի նախապատրաստման առաջին խոշոր փուլի ավարտի մասին։
Նախապատրաստական աշխատանքների շրջանակում ակումբը 130 միլիոն դրամ է ներդրել շինարարության համար նախատեսված հողատարածքով անցնող բարձրավոլտ էլեկտրահաղորդման գծերը ստորգետնյա անցկացնելու համար։
Ինչպես հայտնել են «Նոայից», 35 կիլովոլտ լարման էլեկտրահաղորդման գծերի հենասյուներն ամբողջությամբ ապամոնտաժվել են։ Մոտ 1,6 կիլոմետր երկարությամբ հատվածում իրականացվել են անհրաժեշտ հողային աշխատանքները։
Ընդհանուր առմամբ մասնագետները անցկացրել են 13 040 մետր մալուխ։ Բացի այդ, կառուցվել է էլեկտրահաղորդման պահուստային գիծ, որը պետք է բարձրացնի հարակից գյուղերի էլեկտրամատակարարման հուսալիությունը։
Այս աշխատանքների ավարտը հնարավորություն է տվել ազատել տարածքը ակումբի խոշոր ենթակառուցվածքային նախագծի իրականացման հաջորդ փուլերի համար։
«Նոայից» նաև հայտնել են, որ առաջիկայում կներկայացվի նոր մարզադաշտի նախագիծը, որը պետք է համապատասխանի եվրոպական ամենաբարձր չափանիշներին։ Նախագծի ներկայացումից հետո նախատեսվում է անմիջապես սկսել շինարարական աշխատանքները։
Այսպիսով, ակումբը կատարել է առաջին խոշոր գործնական քայլը սեփական ժամանակակից ֆուտբոլային մարզադաշտի ստեղծման ճանապարհին։
Շինարարության մասին մանրամասն տեսանյութը՝ ԱՅՍՏԵՂ։