Նաիր Տիկնիզյանը երկրորդ տիտղոսը նվաճեց «Ցրվենա Զվեզդայի» հետ. թիմը ձևակերպեց ոսկե դուբլ

Հայաստանի ազգային հավաքականի պաշտպան Նաիր Տիկնիզյանը «Ցրվենա Զվեզդայի» կազմում դարձավ Սերբիայի գավաթակիր։ Եզրափակիչ խաղում բելգրադյան ակումբը հետխաղյա 11-մետրանոց հարվածաշարում հաղթեց «Վոյվոդինային» և նվաճեց մրցաշրջանի երկրորդ տիտղոսը։

Հանդիպման հիմնական ժամանակն ավարտվեց 2:2 հաշվով։ Ընդ որում, «Ցրվենա Զվեզդայի» համար եզրափակիչը չափազանց բարդ ընթացք ունեցավ․ առաջին խաղակեսից հետո Սերբիայի չեմպիոնները պարտվում էին 0:2 հաշվով և շատ մոտ էին պարտությանը։

Բելգրադյան թիմի վերադարձը խաղ սկսվեց Նաիր Տիկնիզյանի անմիջական մասնակցությամբ։ Հայ ֆուտբոլիստը գոլային փոխանցում կատարեց Մարկո Առնաուտովիչին, որը կրճատեց հաշվի տարբերությունը և «Ցրվենա Զվեզդային» վերադարձրեց պայքարի մեջ։

Խաղը փրկել հաջողվեց արդեն ավելացված ժամանակում։ 97-րդ րոպեին Ռոդրիգոն խփեց երկրորդ գոլը և հանդիպումը տեղափոխեց 11-մետրանոց հարվածաշար։ Ֆուտբոլային վիճակախաղում ավելի ուժեղ գտնվեց «Ցրվենա Զվեզդան»՝ 5:4։

Տիկնիզյանի համար սա արդեն երկրորդ տիտղոսն է սերբական ակումբի կազմում։ Ավելի վաղ «Ցրվենա Զվեզդան» ժամկետից շուտ դարձել էր Սերբիայի չեմպիոն, իսկ այժմ չեմպիոնական տիտղոսին ավելացրեց նաև ազգային գավաթի հաղթանակը։

Այսպիսով, թիմը մրցաշրջանն ավարտում է ոսկե դուբլով։ Սերբիայի առաջնության ավարտին «Ցրվենա Զվեզդային» մնացել է անցկացնել ևս երկու հանդիպում, սակայն մրցաշրջանի գլխավոր խնդիրները ակումբն արդեն կատարել է։