Նաիր Տիկնիզյանն առաջին անգամ նվաճեց չեմպիոնական տիտղոս

Հայաստանի հավաքականի պաշտպան Նաիր Տիկնիզյանը նոր էջ բացեց իր կարիերայում։ Բելգրադի «Ցրվենա Զվեզդայի» ֆուտբոլիստն առաջին անգամ ակումբային մակարդակում դարձավ երկրի չեմպիոն։

Բելգրադյան ակումբը ժամկետից շուտ ապահովեց հաղթանակը Սերբիայի առաջնությունում։ Մրցաշրջանի ավարտից մի քանի տուր առաջ «կարմիր-սպիտակները» հարմար առավելություն ստեղծեցին իրենց մոտակա հետապնդողի՝ «Պարտիզանի» նկատմամբ և երաշխավորեցին առաջին տեղը մրցաշարային աղյուսակում։

Հատկապես խորհրդանշական է, որ չեմպիոնությունը ձևակերպվեց գլխավոր մրցակցի նկատմամբ վստահ հաղթանակից հետո։ Դեմ առ դեմ խաղում «Ցրվենա Զվեզդան» 3:0 հաշվով ջախջախեց «Պարտիզանին»՝ փաստացի վերացնելով տիտղոսի ճակատագրի շուրջ վերջին հարցերը։

Տիկնիզյանի համար այս հաջողությունն առանձնահատուկ նշանակություն ունի։ Մինչ սերբական ակումբ տեղափոխվելը նա հանդես էր գալիս Ռուսաստանի մեծ թիմերում՝ ԲԿՄԱ-ում և «Լոկոմոտիվում», սակայն այդ թիմերից ոչ մեկի հետ չէր հաղթել ազգային առաջնությունում։

Ավելի վաղ հայ պաշտպանի ակտիվում կար միայն մեկ թիմային տիտղոս՝ Ռուսաստանի գավաթը 2018/19 մրցաշրջանում ԲԿՄԱ-ի կազմում։ Այն ժամանակ Տիկնիզյանը խաղաժամանակ էր ստացել մրցաշարի մեկ խաղում և աչքի էր ընկել գոլային փոխանցմամբ։

Այս մրցաշրջանում Նաիրը դարձել է «Ցրվենա Զվեզդայի» կազմի կարևոր մասնիկը։ Սերբիայի առաջնությունում նա արդեն անցկացրել է 23 հանդիպում և կատարել 4 գոլային փոխանցում՝ իր ներդրումն ունենալով բելգրադյան գրանդի հերթական տիտղոսում։

Միևնույն ժամանակ ակումբի համար մրցաշրջանը դեռ չի ավարտվել։ «Ցրվենա Զվեզդան» շարունակում է պայքարը Սերբիայի գավաթի համար և կարող է ձևակերպել ներքին դուբլ։ Մրցաշարի կիսաեզրափակչում բելգրադցիները կխաղան Առաջին լիգայի «Եդինստվո» ակումբի դեմ։ Գավաթում Տիկնիզյանը նույնպես ակտիվորեն օգնում է թիմին․ նրա հաշվին կա 1 գոլ և 1 գոլային փոխանցում 4 խաղում։

Մրցաշրջանը կարող է հաջող լինել նաև այլ հայ լեգեոներների համար։ Չեմպիոնական տիտղոսների համար պայքարում են նաև Հենրիխ Մխիթարյանը՝ Միլանի «Ինտերի» կազմում, Տիգրան Բարսեղյանը՝ «Սլովանի» կազմում, և Էդուարդ Սպերցյանը՝ «Կրասնոդարի» կազմում։ Այս բոլոր թիմերը գլխավորում են իրենց ազգային առաջնությունները։