Էդգար Սևիկյանը հարվածեց դարպասի խաչաձողին, սակայն «Սեուտան» պարտվեց «Սպորտինգին»

Նոյեմբերի 1-ին «Սեուտան» Իսպանիայի Սեգունդայի 12-րդ տուրի տնային խաղում 0։2 հաշվով պարտվեց Խիխոնի «Սպորտինգին»։ Հայաստանի ազգային հավաքականի կիսապաշտպան Էդգար Սևիկյանը փոխարինման մտավ 42-րդ րոպեին և դարձավ տանտերերի հարձակման ամենաակտիվ ֆուտբոլիստներից մեկը։

55-րդ րոպեին հայ ֆուտբոլիստը տպավորիչ անհատական անցում կատարեց և ուժեղ հարվածեց դարպասին, սակայն գնդակը դիպավ դարպասի խաչաձողին։ 72-րդ րոպեին Սևիկյանը կրկին մոտ էր գոլի հեղինակ դառնալուն, բայց նրա վտանգավոր հարվածը հետ մղեց «Սպորտինգի» դարպասապահ Ռուբեն Յանյեսը։

Բացի երկու վտանգավոր հարվածներից, 25-ամյա եզրային հարձակվողը կատարեց երկու առանցքային փոխանցում՝ գրանցելով 0.25 սպասվող գոլային փոխանցման ցուցանիշ (xA), ինչպես նաև երկու հաջող դրիբլինգ։

SofaScore-ը Սևիկյանի խաղը գնահատեց 6.8 միավորով։ Նրա խաղադաշտ դուրս գալուց հետո «Սեուտայի» հարձակողական խաղը նկատելիորեն ակտիվացավ, սակայն թիմին այդպես էլ չհաջողվեց իրացնել ստեղծած գոլային պահերը։

«Սեուտայի» համար սա առաջնությունում չորրորդ անընդմեջ պարտությունն էր։ 12 տուրից հետո թիմը վաստակել է ընդամենը 5 միավոր և զբաղեցնում է Սեգունդայի մրցաշարային աղյուսակի վերջին հորիզոնականը։