Երեք համաշխարհային ռեկորդ և Եգիպտոսի ոսկին. ծանրամարտի ԱԱ-2026-ի յոթերորդ օրվա արդյունքները

Նոյեմբերի 2-ին Չինաստանի Նինբո քաղաքում կայացավ ծանրամարտի 2026 թվականի աշխարհի առաջնության մրցումային յոթերորդ օրը։ Մեդալների համար պայքարեցին տղամարդիկ՝ օլիմպիական 85 կգ քաշային կարգում։ Մրցումներն ավարտվեցին երեք համաշխարհային ռեկորդի սահմանմամբ, իսկ աշխարհի չեմպիոն դարձավ Եգիպտոսի ներկայացուցիչ Աբդելռահման Յունեսը։

Եգիպտացի ծանրորդը ընդհատեց Չինաստանի և Հյուսիսային Կորեայի գերիշխանությունը մրցաշարում՝ դառնալով 2026 թվականի աշխարհի առաջնության երկամարտում չեմպիոնի կոչումը նվաճած առաջին մարզիկը, որը չի ներկայացնում այդ երկու երկրներից որևէ մեկը։

Աբդելռահման Յունեսը ոսկե մեդալը նվաճեց համաշխարհային ռեկորդով՝ 390 կգ (177+213)։ Նա նաև արժանացավ արծաթե մեդալի պոկում վարժությունում և բրոնզե մեդալի՝ հրումում։

Երկամարտի արծաթե մեդալակիր դարձավ կոլումբացի Էյսոն Լոպեսը՝ գրանցելով 387 կգ արդյունք։ Ընդ որում, Լոպեսը պոկում վարժությունում սահմանեց համաշխարհային ռեկորդ՝ բարձրացնելով 178 կգ։ Հրում վարժության վերջին մոտեցման ժամանակ նա չկարողացավ բարձրացնել 213 կգ, ինչի շնորհիվ Յունեսը պահպանեց առաջատարի դիրքը։

Երկամարտի բրոնզե մեդալը նվաճեց չինացի Լեյ Ցզյանցինը՝ 382 կգ արդյունքով։

Եվս մեկ համաշխարհային ռեկորդ սահմանեց Հյուսիսային Կորեայի ներկայացուցիչ Ռո Կվանգ Ռյոլը՝ հրում վարժությունում բարձրացնելով 215 կգ։ Սակայն երկամարտում նա զբաղեցրեց միայն հինգերորդ տեղը՝ 378 կգ արդյունքով։

Հատկանշական է, որ երկամարտի բոլոր երեք մեդալակիրները գերազանցեցին նախկին համաշխարհային ռեկորդը՝ 379 կգ, որը սահմանվել էր 2026 թվականի սեպտեմբերին։

Ծանրամարտի ԱԱ-2026. տղամարդկանց 85 կգ քաշային կարգի արդյունքները

Պոկում

1. Էյսոն Լոպես (Կոլումբիա) — 178 կգ (համաշխարհային ռեկորդ)։

2. Աբդելռահման Յունես (Եգիպտոս) — 177 կգ։

3. Մարին Ռոբու (Մոլդովա) — 176 կգ։

Հրում

1. Ռո Կվանգ Ռյոլ (Հյուսիսային Կորեա) — 215 կգ (համաշխարհային ռեկորդ)։

2. Լեյ Ցզյանցին (Չինաստան) — 214 կգ։

3. Աբդելռահման Յունես (Եգիպտոս) — 213 կգ։

Երկամարտ

1. Աբդելռահման Յունես (Եգիպտոս) — 390 կգ (համաշխարհային ռեկորդ)։

2. Էյսոն Լոպես (Կոլումբիա) — 387 կգ։

3. Լեյ Ցզյանցին (Չինաստան) — 382 կգ։

Հայ ծանրորդների արդյունքները

85 կգ քաշային կարգում Հայաստանը ներկայացնում էին երկու մարզիկներ՝ Ռաֆիկ Հարությունյանը և Մարտին Պողոսյանը։ Երկուսն էլ ավարտեցին իրենց ելույթները լավագույն քսանյակից դուրս։

Ռաֆիկ Հարությունյանը երկամարտում գրանցեց 345 կգ (155 կգ պոկում և 190 կգ հրում) արդյունք՝ զբաղեցնելով 22-րդ տեղը։

Մարտին Պողոսյանը 337 կգ (147+190) արդյունքով զբաղեցրեց 23-րդ հորիզոնականը։

Նույն քաշային կարգում հանդես եկան նաև հայկական ծագում ունեցող երկու ծանրորդներ, որոնք ներկայացնում են այլ երկրներ։

Գևորգ Սերոբյանը, որը ներկայացնում է Ռուսաստանը, 347 կգ արդյունքով զբաղեցրեց 19-րդ տեղը։

Անդրանիկ Կարապետյանը, որը ներկայացնում է Բոսնիա և Հերցեգովինան, 346 կգ արդյունքով դարձավ 21-րդը։

Նինբոյում ընթացող ծանրամարտի աշխարհի առաջնությունը կշարունակվի նոյեմբերի 3-ին՝ կանանց 69 կգ քաշային կարգի մրցումներով։ Առաջնությունը կավարտվի նոյեմբերի 8-ին։