Նաիր Տիկնիզյանն ու Գեորգի Հարությունյանը անցկացրին վերջին ստուգողական հանդիպումները մրցաշրջանի վերսկսումից առաջ

Հայաստանի ազգային հավաքականի ֆուտբոլիստներ Նաիր Տիկնիզյանն ու Գեորգի Հարությունյանը ավարտել են պաշտոնական խաղերին նախապատրաստական փուլը՝ մասնակցելով իրենց ակումբների վերջին ընկերական հանդիպումներին։

Այսօր՝ հունվարի 15-ին, Հայաստանի հավաքականի պաշտպան Նաիր Տիկնիզյանը մասնակցել է ամբողջ 90 րոպեին «Ցրվենա Զվեզդա»-ի և ավստրիական «Զալցբուրգ»-ի միջև անցկացված ստուգողական խաղում։ Սերբական ակումբը պարտվել է 0:2 հաշվով։ Դեյան Ստանկովիչի գլխավորած թիմի համար այս հանդիպումը վերջինն էր մրցաշրջանի վերսկսումից առաջ. արդեն հունվարի 22-ին բելգրադցիները Եվրոպայի լիգայի շրջանակում կմրցեն շվեդական «Մալմյո»-ի դեմ։

Գեորգի Հարությունյանը, ով հանդես է գալիս հունգարական «Պուշկաշ Ակադեմիա»-ում, շարունակում է մարզական հավաքները Իսպանիայում։ Չեխական «Սլովան Լիբերեց»-ի դեմ ընկերական խաղում հայ պաշտպանը դաշտ է դուրս եկել երկրորդ խաղակեսում։ Հանդիպումն ավարտվել է հունգարական թիմի նվազագույն հաշվով պարտությամբ՝ 0:1։

«Պուշկաշ Ակադեմիա»-ի համար այս խաղը նույնպես վերջին ստուգողականն էր պաշտոնական մրցաշարերի մեկնարկից առաջ։ Հունգարիայի առաջնությունը կվերսկսվի հունվարի 24-ին, երբ Ժոլտ Հորնյակի թիմը կմրցի «Պակշ»-ի դեմ։