Մոլդովա — Հայաստան․ որտեղ դիտել ֆուտզալի հավաքականների ընկերական հանդիպումը

Այսօր՝ սեպտեմբերի 15-ին, Հայաստանի ֆուտզալի հավաքականը կանցկացնի Մոլդովայի դեմ նախատեսված երկու ընկերական հանդիպումներից առաջինը։ Խաղը կկայանա Չորեսկուի Futsal Arena FMF մարզադահլիճում և կմեկնարկի Երևանի ժամանակով 20:00-ին՝ տեղական ժամանակով 19:00-ին։

Հանդիպման ուղիղ հեռարձակումը կիրականացնի LigaTV.md հարթակը։ Առցանց դիտման արժեքը կկազմի 1 եվրո։ Բացի այդ, հանդիպումը կհեռարձակի մոլդովական WE SPORT TV հեռուստաալիքը, իսկ երկրպագուների համար մուտքը մարզադահլիճ կլինի անվճար։

Թիմերի միջև երկրորդ ընկերական հանդիպումը նույն մարզադահլիճում կկայանա սեպտեմբերի 17-ին։ Խաղի մեկնարկը նախատեսված է Երևանի ժամանակով 18:00-ին։

Նախապատրաստություն ԱԱ-2028-ի ընտրական փուլին

Անտոնիո Ֆերնանդեսի թիմի համար Մոլդովայի դեմ հանդիպումները կդառնան 2028 թվականի աշխարհի առաջնության ընտրական փուլի հիմնական փուլին նախապատրաստվելու մաս։ Ավելի վաղ Հայաստանի հավաքականի գլխավոր մարզիչը նշել էր, որ այս հանդիպումները հնարավորություն կտան ստուգել նորեկներին, վերականգնել խաղային կապերը և անհրաժեշտ մարզավիճակ ձեռք բերել պաշտոնական հանդիպումների մեկնարկից առաջ։

Ընտրական մրցաշարում Հայաստանի հավաքականը հանդես կգա 1-ին խմբում, որտեղ նրա մրցակիցները կլինեն Հունգարիան և Շվեդիան։ Առաջին հանդիպումը Հայաստանը կանցկացնի հոկտեմբերի 20-ին՝ սեփական հարկի տակ ընդունելով Հունգարիայի հավաքականին։

Հայաստանը առավելություն ունի անձնական հանդիպումներում

Մոլդովայի ֆուտբոլի ֆեդերացիայի տվյալներով՝ Հայաստանի հավաքականը ՖԻՖԱ-ի վարկանիշում զբաղեցնում է 15-րդ տեղը, իսկ Մոլդովայի թիմը գտնվում է 66-րդ հորիզոնականում։

Նախկինում մրցակիցները հանդիպել են ութ անգամ։ Հայաստանը տարել է վեց հաղթանակ, մեկ հանդիպում ավարտվել է ոչ-ոքի, իսկ ևս մեկում հաղթել է Մոլդովան։ Վերջին հանդիպումը կայացել է 2025 թվականի դեկտեմբերի 21-ին միջազգային մրցաշարի շրջանակում և ավարտվել Հայաստանի հավաքականի՝ 2:1 հաշվով հաղթանակով։

1-ին խմբի հանդիպումների ժամանակացույցը․

• 2026 թվականի հոկտեմբերի 15․ Հունգարիա — Շվեդիա
• 2026 թվականի հոկտեմբերի 20․ Հայաստան — Հունգարիա
• 2026 թվականի նոյեմբերի 7․ Շվեդիա — Հայաստան
• 2026 թվականի դեկտեմբերի 9․ Հայաստան — Շվեդիա
• 2027 թվականի փետրվարի 27․ Շվեդիա — Հունգարիա
• 2027 թվականի մարտի 3․ Հունգարիա — Հայաստան

Հայաստանի ֆուտզալի հավաքականը հրապարակել է ուսումնամարզական հավաքի և Մոլդովայի դեմ հանդիպումների կազմը