Մխիթարյանն առաջին անգամ «Ինտերի» մեկնարկային կազմում էր այս մրցաշրջանում․ 6 հարված և 5:3 հաշվով հաղթանակ

Հայաստանի ազգային հավաքականի կիսապաշտպան Հենրիխ Մխիթարյանը 2026/27 մրցաշրջանում առաջին անգամ ընդգրկվել է «Ինտերի» մեկնարկային կազմում։ 37-ամյա ֆուտբոլիստը 62 րոպե անցկացրեց «Ուդինեզեի» դեմ խաղում, որտեղ միլանյան ակումբը 0:2 հաշվից տպավորիչ վերադարձ կատարեց և հաղթեց 5:3 հաշվով։

Հանդիպման մեկնարկը չափազանց անհաջող ստացվեց «Ինտերի» համար։ Արդեն 16-րդ րոպեին հյուրերը երկու գնդակի առավելություն ունեին՝ Ջեյմս Աբանկվայի և Յուրգեն Էկելենկամպի գոլերի շնորհիվ։

Սակայն դեռ առաջին խաղակեսում Իտալիայի գործող չեմպիոնները կարողացան վերականգնել հավասարակշռությունը։ 26-րդ րոպեին աչքի ընկավ Կառլոս Աուգուստոն, իսկ 35-րդ րոպեին Նիկոլո Բարելան հաշիվը դարձրեց 2:2։

Ընդմիջումից հետո «Ինտերը» շարունակեց ճնշումը։ 57-րդ րոպեին Մարկուս Թյուրամը առաջին անգամ առաջ մղեց տանտերերին, որից հետո Ֆրանչեսկո Պիո Էսպոզիտոն և Անժ-Յոան Բոննին միլանյան թիմի առավելությունը հասցրին 5:2-ի։ 90-րդ րոպեին Իդրիսա Գեյեն խփեց «Ուդինեզեի» երրորդ գոլը և ձևակերպեց հանդիպման վերջնական հաշիվը՝ 5:3։

Մխիթարյանը 6 հարված կատարեց և մոտ էր գոլին

Հենրիխ Մխիթարյանը գոլով կամ գոլային փոխանցմամբ չնշվեց, սակայն «Ինտերի» ամենաակտիվ ֆուտբոլիստներից մեկն էր գրոհների եզրափակիչ փուլում։

Հայ կիսապաշտպանը դարպասին կատարեց 6 հարված, իսկ սպասվող գոլերի ցուցանիշը կազմեց 0,39 xG։ Բացի այդ, Մխիթարյանը չիրացրեց մեկ ակնհայտ գոլային հնարավորություն։

Հենրիխը մոտ էր նաև գոլային փոխանցում գրանցելուն։ Նրա հաշվին գրանցվեց 2 սուր փոխանցում, իսկ սպասվող գոլային փոխանցումների ցուցանիշը կազմեց 0,6 xA։

Միևնույն ժամանակ Մխիթարյանը, ինչպես միշտ, վստահ էր գնդակով խաղում։ Նա կատարեց 32 փոխանցումից 30-ը ճշգրիտ՝ ապահովելով 94 տոկոս ճշգրտություն։

62-րդ րոպեին արդեն դեղին քարտ ունեցող հայ ֆուտբոլիստը փոխարինվեց։ SofaScore-ը Մխիթարյանի խաղը գնահատեց 6,9 միավորով։

Ինչպես են իտալական լրատվամիջոցները գնահատել Մխիթարյանի խաղը

37-ամյա կիսապաշտպանի ելույթը իտալական մամուլում ընդհանուր առմամբ ստացել է զուսպ դրական գնահատականներ։

Eurosport — 6։ Պարբերականը նշել է Մխիթարյանի կատարած մեծ ծավալի աշխատանքը և դարպասին հաճախ հարվածելու նրա ձգտումը, թեև ոչ բոլոր փորձերն էին ուղղվում դարպասի ուղղությամբ։

Calciomercato — 5,5։ Լրագրողները նշել են, որ Մխիթարյանի հայտնվելը մեկնարկային կազմում որոշակի անակնկալ էր։ Միևնույն ժամանակ կիսապաշտպանին մի քանի դրվագներում չի բավականացրել ճշգրտությունը, իսկ ամենավտանգավոր պահերից մեկում նրա հարվածը հետ է մղել «Ուդինեզեի» դարպասապահ Մադուկա Օկոյեն։

FCInterNews — 6։ Պարբերականն ընդգծել է հայ ֆուտբոլիստի ակտիվ պրեսինգը և գնդակը հնարավորինս արագ առաջ տանելու նրա ձգտումը։ Մխիթարյանը նաև շատ մոտ էր «Ինտերի» երրորդ գոլը խփելուն, սակայն Օկոյեն կարողացավ հետ մղել նրա հարվածը։

Leggo — 6,5։ Նշված իտալական լրատվամիջոցներից ամենաբարձր գնահատականը Մխիթարյանը ստացել է Leggo-ից։ Լրագրողները նշել են, որ հանդիպման բարդ մեկնարկից հետո կիսապաշտպանը զգալիորեն ավելացրել է, մեծ ծավալի վազքային աշխատանք կատարել, ակտիվորեն մասնակցել պրեսինգին և փորձել սրել խաղը ուղղահայաց փոխանցումներով։

Այսպիսով, Հենրիխ Մխիթարյանի առաջին ելույթը «Ինտերի» մեկնարկային կազմում ընթացիկ մրցաշրջանում ավարտվեց միլանյան թիմի տպավորիչ հաղթանակով։ Չնայած գոլի կամ գոլային փոխանցման բացակայությանը՝ հայ կիսապաշտպանը պարբերաբար սպառնացել է մրցակցի դարպասին և ունեցել է արդյունավետ գործողությամբ աչքի ընկնելու հնարավորություններ։