Մելիքբեկյանն ու Կոբիաշվիլին Ինֆանտինոյի հետ քննարկել են երիտասարդական ԱԱ-2029-ի նախապատրաստական աշխատանքները
- Հեղինակ: Vahe Hakobyan
- Sportaran
Հայաստանի ֆուտբոլի ֆեդերացիայի նախագահ Արմեն Մելիքբեկյանը և Վրաստանի ֆուտբոլի ֆեդերացիայի ղեկավար Լևան Կոբիաշվիլին հանդիպում են անցկացրել ՖԻՖԱ-ի նախագահ Ջաննի Ինֆանտինոյի հետ։ Այս մասին հայտնում է ՀՖՖ մամուլի ծառայությունը։
Զրույցի ընթացքում կողմերը քննարկել են 2029 թվականի երիտասարդական աշխարհի առաջնության առաջիկա անցկացումը, որի կազմակերպման իրավունքը ստացել են Հայաստանը և Վրաստանը։ Երկու երկրների ֆուտբոլային ֆեդերացիաների ղեկավարներն ընդգծել են, որ այս առաքելությունն ընկալում են որպես մեծ պատիվ և միաժամանակ՝ լուրջ պատասխանատվություն։
Մելիքբեկյանն ու Կոբիաշվիլին շնորհակալություն են հայտնել ՖԻՖԱ-ին ցուցաբերած վստահության համար՝ նշելով, որ մրցաշարի համատեղ անցկացումը կարևոր իրադարձություն կլինի ոչ միայն հայկական և վրացական ֆուտբոլի, այլև ամբողջ տարածաշրջանի համար։
Հանդիպման ընթացքում Հայաստանի և Վրաստանի ներկայացուցիչները հաստատել են իրենց պատրաստակամությունը՝ միավորելու ջանքերը մրցաշարը բարձր մակարդակով կազմակերպելու համար։ Նրանց խոսքով՝ երկու երկրներն էլ մտադիր են օգտագործել անհրաժեշտ ողջ ներուժը, որպեսզի 2029 թվականի երիտասարդական աշխարհի առաջնությունն անցնի իսկական ֆուտբոլային տոնի մթնոլորտում։
Առանձնահատուկ ուշադրություն է դարձվել կազմակերպչական որակի, ենթակառուցվածքների և հյուրընկալության հարցերին։ Մելիքբեկյանն ու Կոբիաշվիլին ընդգծել են, որ Հայաստանն ու Վրաստանը վճռական են մրցաշարը հիշարժան դարձնելու թիմերի, երկրպագուների և ամբողջ միջազգային ֆուտբոլային ընտանիքի համար։
Քննարկեք նորությունները!
Անցնել մեկնաբանություններին ↓
Comments
0