Մանուել Տուլիպան՝ «Արարատ-Արմենիայի» պատմական՝ Եվրոպայի լիգա դուրս գալուց հետո. «Այժմ գնում ենք հաջորդ նպատակների հետևից»

«Արարատ-Արմենիան» պատմական արդյունքի հասավ եվրոպական ակումբային մրցաշարերում։ Երևանի թիմը Եվրոպայի լիգայի փլեյ-օֆֆ փուլի պատասխան խաղում հաղթեց ռումինական «Ունիվերսիտատեա Կրայովային» և հայկական ֆուտբոլի պատմության մեջ առաջին անգամ դուրս եկավ մրցաշարի լիգայի փուլ։

Պատասխան հանդիպումը կայացավ օգոստոսի 27-ին Երևանում՝ Վազգեն Սարգսյանի անվան Հանրապետական մարզադաշտում։ «Արարատ-Արմենիան» հաղթեց 1:0 հաշվով, իսկ երկու խաղերի ընդհանուր արդյունքում՝ 2:1։ Ռումինիայում կայացած առաջին հանդիպումն ավարտվել էր ոչ-ոքի՝ 1:1։ Պատմական հաղթական գոլը Սանդրո Լիման խփեց ավելացված ժամանակի ութերորդ րոպեին։ Այսպիսով, «Արարատ-Արմենիան» դարձավ առաջին հայկական ակումբը, որը հանդես կգա Եվրոպայի լիգայի հիմնական՝ լիգայի փուլում։

Եվրոպայի լիգայի լիգայի փուլի վիճակահանությունը կկայանա օգոստոսի 28-ին։ Արարողությունը կմեկնարկի Երևանի ժամանակով ժամը 15:00-ին։

Պատմական խաղից հետո «Արարատ-Արմենիայի» գլխավոր մարզիչ Մանուել Տուլիպան մասնակցեց մամուլի ասուլիսի, որը սկսվեց նրա հասցեին հնչած բուռն ծափահարություններով։

Մանուել Տուլիպայի բացման խոսքը

— Այս հաղթանակը կարևոր էր ոչ միայն ֆուտբոլիստների և ակումբի, այլև ամբողջ երկրի համար, քանի որ առաջին անգամ հայկական թիմը կխաղա Եվրոպայի լիգայի հիմնական փուլում։ Երբ եկա թիմ, իմ նպատակն էր ֆուտբոլիստներին սովորեցնել երազել, իրենց առջև դնել ամենաբարձր նպատակներն ու հասնել դրանց։ Հենց դա էր առաջ մղում ամբողջ թիմի աշխատանքը։ Այժմ գնում ենք հաջորդ նպատակների հետևից։

«Սա մեր լավագույն խաղը չէր»

— Այսօր «Արարատ-Արմենիայի» մոտ հարձակման գծում շատ բան չէր ստացվում, իսկ մրցակիցն ավելի լավ էր գրոհում։ Ինչպե՞ս թիմին հաջողվեց այսքան համբերատար անցկացնել ամբողջ հանդիպումը։

— Սա մեր լավագույն խաղը չէր, հատկապես առաջին խաղակեսում։ Մենք չէինք կարողանում հարձակման ժամանակ բավարար ճնշում ստեղծել։ Երբ գնդակին տիրում էինք, հաճախ շտապում էինք, սխալ փոխանցումներ կատարում և ոչ հազվադեպ դիմում երկար փոխանցումների, ինչը այնքան էլ բնորոշ չէ մեր թիմին։ Սովորաբար մենք խաղում ենք կարճ փոխանցումներով և ավելի շատ ենք վերահսկում գնդակը։ Այս առումով այսօր չցուցադրեցինք մեր սովորական խաղը։

Ընդմիջմանը մի փոքր փոխեցինք մեր խաղը, ցանկանում էինք ավելի ակտիվ պրեսինգ կիրառել։ Կրկին ստիպված եղանք հարձակման գծում զոհաբերել Արթուր Սերոբյանի խաղը. նա սկսեց պաշտպանությունում հանդես գալ որպես լատերալ։ Մենք անցանք 5-3-2 դասավորության և այդ կերպ ավելի շատ խնդիրներ ստեղծեցինք մրցակցի համար։ Սկսեցինք ավելի շատ տիրել գնդակին։

Ես կառանձնացնեի երկու առանցքային գործոն, որոնք օգնեցին մեզ հաղթել։ Առաջինը մեր աշխատանքն էր ընդմիջման ժամանակ, երբ փոխեցինք մարտավարությունը։ Երկրորդը՝ հաջողությունը։ Այսօր հաջողությունն ամբողջությամբ մեր կողմն էր։

Տուլիպան՝ Ժոաո Բրավիմի խաղի մասին

— Ինչպե՞ս կգնահատեք դարպասապահ Ժոաո Բրավիմի խաղը և ընդհանրապես նրա ելույթները եվրոպական ակումբային մրցաշարերում։

— Մոտ մեկ ամիս առաջ մենք բաժանվեցինք դարպասապահ Բրունո Պինտուից, որը մեզ հետ չեմպիոն էր դարձել։ Բրավիմին թիմ հրավիրելու որոշումը ճիշտ էր։

Բրավիմն ու Պինտուն շատ տարբեր դարպասապահներ են։ Պինտուն փոխանցումներով շատ լավ էր սկսում գրոհները, բայց բարձրահասակ չէր և այնքան էլ հաճախ չէր փրկում թիմին այնպիսի հարվածներից հետո, որոնք, թվում էր, անհնար էր հետ մղել։ Իսկ Բրավիմն անհավանական սեյվեր է կատարում, սակայն փոխանցումներով գրոհները սկսելու հարցում զգալիորեն զիջում է։

Ընդհանուր առմամբ գոհ եմ պաշտպանների խաղից։ Էդգար Գրիգորյանը, երկու կենտրոնական պաշտպանները և նույնիսկ Բուենոն, որը եզրում իրեն այնքան էլ հարմարավետ չի զգում, հիանալի հանդիպում անցկացրին։

Ինչու 11-մետրանոցը կատարեց Սանդրո Լիման

— Սովորաբար թիմում 11-մետրանոցները կատարում է Խուան Բալանտան, սակայն այս անգամ գնդակը վերցրեց Սանդրո Լիման։ Դա Բալանտայի՞ որոշումն էր։

— Մենք ունենք ֆուտբոլիստների ցանկ, որոնք կատարում են 11-մետրանոցները։ Այժմ այդ ցուցակում առաջինը Սանդրո Լիման է, ուստի հենց նա էլ կատարեց հարվածը։

«Ես առաջին անգամ եմ աշխատում արտերկրում, և այստեղ շատ լավ են ընդունում ինձ ու ընտանիքիս»

— Ինչի՞ մասին առաջինը մտածեցիք, երբ հնչեց եզրափակիչ սուլիչը։

— Ես շատ հուզված էի։ Առաջին անգամ եմ աշխատում արտերկրում, և այստեղ շատ լավ են ընդունում թե՛ ինձ, թե՛ ընտանիքիս։

Նման պահերին մտածում ես այն մարդկանց մասին, որոնց այս հաղթանակը հսկայական ուրախություն է պարգևել՝ այս երկրի բնակիչների, ակումբի աշխատակիցների, մարզադաշտում գտնվող երկրպագուների, որոնք մեզ շատ ուժեղ աջակցում էին։

Սովորաբար փորձում եմ զուսպ լինել, սակայն այս անգամ ստիպված էի ցույց տալ զգացմունքներս։ Շատ ուրախ եմ ֆուտբոլիստների համար, քանի որ նրանք ամեն օր ձգտում են ավելի լավը դառնալ և գնում են իրենց նպատակի հետևից։ Նրանք դեռ իրենք էլ չգիտեն իրենց հնարավորությունների սահմանը, և ես շատ ուրախ եմ տեսնել նրանց աշխատասիրությունը։

Մանուել Տուլիպան պատմական հաղթանակից հետո սափրեց մորուքը

— Ե՞րբ հասցրեցիք սափրել մորուքը։ Խաղից անմիջապես հետո՞։

— Այո՛, խաղից հետո։

Դրանից հետո Մանուել Տուլիպան դիմեց լրագրողին, որի հետ նախօրեին գրազ էր եկել.

— Դու նույնպես անպայման պետք է սափրվես։ Եվ խոստանում եմ քեզ նվիրել արջով իմ խորհրդանշական մարզաշապիկը, եթե սափրվես։

Լրագրողը, որին դիմեց «Արարատ-Արմենիայի» գլխավոր մարզիչը, աչքի է ընկնում շատ փարթամ մորուքով։

Ում հետ է Տուլիպան ցանկանում խաղալ Եվրոպայի լիգայում

— Կա՞ մրցակից, որի դեմ հատկապես կցանկանայիք խաղալ Եվրոպայի լիգայում։

— Երկու ակումբ կա, որոնց դեմ շատ եմ ցանկանում խաղալ։ Դրանք պորտուգալական երկու ակումբներ են՝ «Բենֆիկան» և «Բրագան»։ Այդ դեպքում հնարավորություն կունենամ հանդիպելու ընկերներիս, որոնց վաղուց չեմ տեսել։

Անկեղծ կլինեմ. այս մրցաշրջանում Եվրոպայի լիգայում մրցակցությունը շատ բարձր է։ Այստեղ շատ թոփ ակումբներ կան, ինչը չի կարելի ասել Կոնֆերենցիաների լիգայի մասին։

Չմոռանանք նաև, որ այս մրցաշրջանում եվրոպական ակումբային մրցաշարերում հաղթել ենք մեր բոլոր չորս տնային հանդիպումներում։

Կուժեղացնի՞ «Արարատ-Արմենիան» կազմը Եվրոպայի լիգայից առաջ

— «Արարատ-Արմենիան» շատ մրցունակ կազմ ունի, սակայն որքանո՞վ է այն ձեզ բավարարում Եվրոպայի լիգայում ելույթներից առաջ։ Թիմում այլ փոփոխություններ կլինե՞ն։

— Մենք շատ լավ կազմ ունենք։ Ինձ համար հաճելի գլխացավանք է խաղի համար ֆուտբոլիստներ ընտրելը, քանի որ թիմում մեծ մրցակցություն կա։

Ես շատ գոհ եմ նորեկներից։ Ժամանակի ընթացքում մենք ավելի լավ ենք խաղալու, երբ բոլոր նոր ֆուտբոլիստներն ամբողջությամբ հարմարվեն։

Բացի այդ, չմոռանանք, որ երկու շատ կարևոր ֆուտբոլիստներ վնասվածքների պատճառով չէին խաղում՝ Կամո Հովհաննիսյանը և Արմեն Համբարձումյանը։ Համբարձումյանն արդեն ապաքինվել է, իսկ Կամոն նույնպես շուտով պատրաստ կլինի խաղալ։ Համոզված եմ, որ նրանք զգալիորեն կուժեղացնեն մեր թիմը։

Ինչպես է Տուլիպան մոտիվացնելու թիմին պատմական հաջողությունից հետո

— Գիտե՞ք, թե ինչպես եք մոտիվացնելու ֆուտբոլիստներին հաջորդ հանդիպումների համար այսպիսի մեծ հաղթանակից և այսքան ուժեղ էմոցիոնալ վերելքից հետո։

— Չեմ կարծում, որ ֆուտբոլիստներին մոտիվացնելը դժվար կլինի։ Դեռ ոչ ոք իրեն թագավոր չի զգում։ Բոլորը հաղթանակների քաղց ունեն և ձգտելու են հաղթել յուրաքանչյուր խաղում։

Մեր թիմում հոգեբան չկա, սակայն անձամբ ես ունեմ հոգեբան, որն օգնում է ինձ ֆուտբոլիստների հետ աշխատանքում։

Այս մրցաշրջանում մենք հաստատ պայքարելու ենք Հայաստանի չեմպիոնության համար։

«Արարատ-Արմենիայի» նպատակները առաջնությունում, Գավաթում և Եվրոպայի լիգայում

— «Արարատ-Արմենիան» այս մրցաշրջանում պայքարելու է երեք ճակատով։ Ի՞նչ նպատակներ եք դնում ձեր առջև մրցաշրջանի և առանձին՝ Եվրոպայի լիգայի համար։

— Մրցաշրջանի մեկնարկից առաջ ենթադրում էինք, որ կարող ենք հայտնվել նման իրավիճակում։ Նվազագույն նպատակը Կոնֆերենցիաների լիգա դուրս գալն էր, և այնտեղ մասնակցությունն ապահովեցինք բավական արագ։

Մեր թիմում կա 23 մրցունակ ֆուտբոլիստ՝ չհաշված դարպասապահներին։ Ուստի բավական մեծ կազմ ունենք բոլոր մրցաշարերում հաղթանակի համար խաղալու նպատակով։

Թիմում կան տարբեր խաղաոճ ունեցող բազմաթիվ ֆուտբոլիստներ, որոնք կարող են օգտակար լինել տարբեր սցենարների և խաղային իրավիճակների դեպքում։ Վերջին շաբաթներին մենք փաստացի երկու ամբողջությամբ տարբեր կազմ ունեինք՝ մեկը եվրոպական ակումբային մրցաշարերի, մյուսը՝ առաջնության համար։ Բայց միշտ այդպես չի լինելու։

Առաջնությունում այլևս մեծ ռոտացիա չի լինի, որովհետև ես հստակ որոշել եմ՝ ցանկանում եմ կրկին հաղթել առաջնությունը։

Տուլիպան շնորհակալություն հայտնեց «Արարատ-Արմենիայի» երկրպագուներին

— Դուք նշեցիք հաղթանակի երկու պատճառ։ Երրորդ պատճա՞ռը մարզադաշտում երկրպագուների աջակցությունն էր։

— Իհարկե։ Ինձ համար շատ կարևոր էր, որ նույնիսկ ամենադժվար պահերին երկրպագուները միասին աջակցում էին թիմին և վանկարկում նրա անունը։ Դա մեզ շատ էր օգնում։

Եթե մեր երկրպագուները մեզ հետ լինեին նաև Ռումինիայում կայացած առաջին խաղում, մենք այնտեղ էլ կհաղթեինք, որովհետև ավելի լավ էինք խաղում։

«Արարատ-Արմենիան» առաջին անգամ կխաղա Եվրոպայի լիգայի լիգայի փուլում

«Ունիվերսիտատեա Կրայովայի» նկատմամբ հաղթանակը դարձավ հայկական ակումբային ֆուտբոլի պատմության ամենանշանակալի արդյունքներից մեկը։ Ռումինիայում 1:1 հաշվով ոչ-ոքիից հետո Մանուել Տուլիպայի թիմը Երևանում հաղթանակի հասավ հանդիպման ամենավերջում Սանդրո Լիմայի խփած գոլի շնորհիվ և նվաճեց Եվրոպայի լիգայի լիգայի փուլի պատմական ուղեգիր։

Այժմ «Արարատ-Արմենիային» սպասում է մրցաշարի հիմնական փուլի վիճակահանությունը, որը կկայանա օգոստոսի 28-ին։ Երևանի ակումբը կիմանա իր ապագա մրցակիցներին և առաջին անգամ Հայաստանը կներկայացնի Եվրոպայի լիգայի լիգայի փուլում։