Պատմություն․ «Արարատ-Արմենիան» դարձավ առաջին հայկական ակումբը, որը դուրս եկավ Եվրոպայի լիգա

«Արարատ-Արմենիան» Եվրոպայի լիգայի փլեյ-օֆֆ փուլի պատասխան խաղում հաղթեց ռումինական «Ունիվերսիտատյա Կրայովային» և հայկական ֆուտբոլի պատմության մեջ առաջին անգամ դուրս եկավ մրցաշարի հիմնական՝ լիգային փուլ։ Պատմական գոլը Սանդրո Լիման խփեց 92-րդ րոպեին։

«Արարատ-Արմենիա» — «Ունիվերսիտատյա Կրայովա» — 1:0

Երկու խաղերի ընդհանուր հաշիվը՝ 2:1

Կրայովայում կայացած առաջին հանդիպումն ավարտվել էր ոչ-ոքի՝ 1:1, ուստի Եվրոպայի լիգայի լիգային փուլի ուղեգրի ճակատագիրը որոշվում էր պատասխան խաղում։

Հանդիպումն անցավ փակ և հավասար պայքարում։ Միևնույն ժամանակ ռումինական թիմն ավելի հաճախ էր սպառնում մրցակցի դարպասին և խաղի ընթացքում ավելի մոտ էր գոլ խփելուն։ «Արարատ-Արմենիայի» գլխավոր հերոսներից մեկը դարձավ դարպասապահ Ժոաո Բրավիմը, որը կատարեց միջին և բարձր բարդության վեց սեյվ։

Հանգուցալուծումը վրա հասավ արդեն ավելացված ժամանակում։

Հանդիպման վերջնամասում Խուան Բալանտան 11-մետրանոց վաստակեց։ Բալանտան թիմի հիմնական 11-մետրանոց իրացնողն է, սակայն գնդակը փոխանցեց Սանդրո Լիմային։ Բրազիլացի հարձակվողը չկարողացավ իրացնել առաջին հարվածը, սակայն մրցավարը նշանակեց կրկնակի 11-մետրանոց՝ «Ունիվերսիտատյայի» ֆուտբոլիստների կողմից կանոնների խախտման պատճառով։

Երկրորդ փորձից Լիման նույնպես չկարողացավ անմիջապես 11-մետրանոցի նշակետից գրավել դարպասը, սակայն առաջինը հասավ հետ մղված գնդակին և 92-րդ րոպեին այն ուղարկեց դարպասը՝ 1:0։

Այս գոլը պատմական դարձավ հայկական ֆուտբոլի համար։ Գոլից անմիջապես հետո Լիման գնաց այն տոնելու երկրպագուների հետ։

Երկու հանդիպումների արդյունքում «Արարատ-Արմենիան» հաղթեց 2:1 ընդհանուր հաշվով և նվաճեց Եվրոպայի լիգայի լիգային փուլի ուղեգիր։

Ակումբի համար սա եվրագավաթային մրցաշարի հիմնական փուլ դուրս գալու առաջին դեպքն է։ Նախկինում «Արարատ-Արմենիան» երկու անգամ կանգ էր առել որակավորման փլեյ-օֆֆ փուլում։ Հայկական թիմերն արդեն հանդես են եկել Կոնֆերենցիաների լիգայի հիմնական փուլում, սակայն Եվրոպայի լիգայում Հայաստանի ներկայացուցիչը կխաղա պատմության մեջ առաջին անգամ։

«Արարատ-Արմենիան» եվրագավաթային մրցաշրջանը սկսել էր Չեմպիոնների լիգայում, որտեղ հաղթահարել էր «Ռիգայի» և «Շեմրոք Ռովերսի» արգելքները, սակայն երրորդ փուլում զիջել էր «Ցելյեին» և պայքարը շարունակել Եվրոպայի լիգայում։

Թիմերի կազմերը

«Արարատ-Արմենիա»․ Ժոաո Բրավիմ — Ուգո Օլիվեյրա (90, Ալվին Տերա), Ժունիոր Բուենո, Բրունո Ուիլսոն, Ալեքսանդրոս Մալիս, Էդգար Գրիգորյան — Կարեն Մուրադյան (90, Կարլյե), Բենի Դիաշ (70, Կառլոս Ֆրանսա) — Արթուր Սերոբյան (79, Բալանտա), Զիդան Բանջակի (79, Շաղոյան) — Սանդրո Լիմա։

«Ունիվերսիտատյա Կրայովա»․ Պոպեսկու — Ռոմանչուկ, Ստևանովիչ, Սկրեչիու — Մորա, Մեկվաբիշվիլի, Բալուցա (62, Տելեշ), Բրանչու — Չիկելդեու, Ալ-Հավլավի (72, Նսիմբա), Բայարամ (89, Էտիմ)։