Էդգար Ֆիթլիջյանը ընդգրկվել է իսպանական «Խերեսի» հիմնական կազմում

19-ամյա հայ դարպասապահ Էդգար Ֆիթլիջյանը ընդգրկվել է իսպանական Xerez Club Deportivo ակումբի հիմնական կազմում, որը հանդես է գալիս Segunda Federación – Group 4-ում՝ Իսպանիայի առաջնության ուժով չորրորդ դիվիզիոնում։

Նոր մրցաշրջանի մեկնարկից առաջ «Խերեսը» պաշտոնապես ներկայացրել է առաջին թիմի կազմը։ Ներկայացված ֆուտբոլիստների թվում էր նաև հայ դարպասապահը։

Ֆիթլիջյանը իսպանական ակումբ է տեղափոխվել 2024 թվականին Երևանի «Արարատից»։ Հայաստանում դարպասապահը հանդես էր գալիս մայրաքաղաքային ակումբի երկրորդ թիմում՝ Առաջին լիգայում։

Իսպանիա տեղափոխվելուց հետո Ֆիթլիջյանը խաղացել է «Խերեսի» երիտասարդական թիմում, իսկ այժմ տեղափոխվել է ակումբի հիմնական կազմ։

Միջազգային մակարդակում դարպասապահը նաև Հայաստանի պատանեկան հավաքականներում հանդես գալու փորձ ունի։ Նա երկու հանդիպում է անցկացրել Հայաստանի տարբեր տարիքային պատանեկան հավաքականների կազմում։