Դավիթ Մգոյանը MVP-1 մրցաշարում հաղթեց UFC-ի նախկին մարտիկ Ալբերտ Մորալեսին (ՏԵՍԱՆՅՈՒԹ)

Եզդիական ծագումով հայ MMA մարտիկ Դավիթ Մգոյանը (9-1) կարևոր հաղթանակ տարավ Կալիֆորնիայում կայացած MVP-1 մրցաշարում։ 21-ամյա մարզիկը մրցավարների միաձայն որոշմամբ հաղթեց UFC-ի նախկին մարտիկ Ալբերտ Մորալեսին։

Երեք ռաունդների արդյունքներով բոլոր մրցավարները հաղթանակը շնորհեցին Մգոյանին։ Մրցավարական գնահատականներն էին՝ 29-28, 30-26 և 30-27՝ հօգուտ հայ մարտիկի։

Մգոյանի համար այս հաղթանակը կարիերայի ամենանշանակալիներից մեկն էր։ Նրա մրցակիցը փորձառու Ալբերտ Մորալեսն էր, որն ունի մեծ պրոֆեսիոնալ փորձ և հանդես է եկել UFC-ում։ Չնայած մրցակցի կարգավիճակին՝ Դավիթն անցկացրեց վառ և վստահ մենամարտ, կարողացավ թելադրել իր տեմպը և հասնել արժանի հաղթանակի։ Նրա անկյունում էր նաև Արման Ծառուկյանը։

Այս հաջողությունից հետո Մգոյանի ռեկորդը պրոֆեսիոնալ MMA-ում դարձավ 9-1։ Մորալեսը կրեց կարիերայի 11-րդ պարտությունը՝ ունենալով 19 հաղթանակ և մեկ ոչ-ոքի։

MVP-1 մրցաշարը Ջեյք Փոլի նոր MMA լիգայի առաջին իրադարձությունն էր և հավաքել էր տպավորիչ կազմ՝ ինչպես մասնակիցների, այնպես էլ աստղային հյուրերի առումով։ Շոուի շուրջ ներգրավված էին այնպիսի հայտնի անուններ, ինչպիսիք են Ֆրենսիս Նգանուն, Նեյթ Դիազը, Մայք Փերին և մարտարվեստների աշխարհի այլ ներկայացուցիչներ։

Այսպիսի մեծ հնչեղություն ունեցող մրցաշարի ֆոնին Դավիթ Մգոյանի հաղթանակը հատկապես նշանակալի է թվում։ Երիտասարդ հայ մարտիկը շարունակում է վառ կերպով ներկայանալ ԱՄՆ-ում և կարևոր քայլ է կատարում իր կարիերայում։

ՏԵՍԱՆՅՈՒԹ՝