Դավիթ Դավթյանը վերջին վայրկյաններին նվաճեց Մ20 ԱԱ-ի բրոնզը

Հայաստանի ներկայացուցիչ Դավիթ Դավթյանը (70 կգ) բրոնզե մեդալ է նվաճել Բրատիսլավայում ընթացող ազատ ոճի ըմբշամարտի Մ20 տարեկանների աշխարհի առաջնությունում։

Երրորդ տեղի համար գոտեմարտում Դավթյանը դրամատիկ հաղթանակ է տարել Եգիպտոսի ներկայացուցիչ Մոհամեդ Ահմեդի նկատմամբ՝ 7:6 հաշվով։

Հայ ըմբիշը պարտվում էր 2:6 հաշվով, սակայն կարողացավ բեկել գոտեմարտի ընթացքը։ Սկզբում Դավթյանը կրճատեց տարբերությունը՝ 4:6, իսկ վերջին վայրկյաններին վճռորոշ հնարք կատարեց և հաղթանակ կորզեց։

ՏԵՍԱՆՅՈՒԹ

Բրոնզե մեդալի ճանապարհին Դավթյանը վստահ հաղթեց Բուլղարիայի ներկայացուցչին՝ 10:0, այնուհետև առավելության հասավ Մոլդովայի ըմբիշի նկատմամբ՝ 7:4։ Ադրբեջանցի մարզիկից 0:10 հաշվով կրած պարտությունից հետո Հայաստանի ներկայացուցիչը շարունակեց պայքարը բրոնզե մեդալի համար և 5:4 հաշվով հաղթեց հնդիկ ըմբիշին, իսկ մեդալային գոտեմարտում 7:6 հաշվով առավելության հասավ եգիպտացու նկատմամբ։

Այս պարգևը դարձավ Հայաստանի հավաքականի ազատ ոճի ըմբիշների առաջին մեդալը ընթացիկ Մ20 աշխարհի առաջնությունում։

Այսօր Հայաստանը մեդալների թիվն ավելացնելու ևս մեկ հնարավորություն կունենա․ Հենրիկ Հայկյանը (125 կգ) նույնպես կանցկացնի բրոնզե մեդալի համար գոտեմարտ։