Արսեն Հարությունյանը RAF 10-ում գոտեմարտ կանցկացնի օլիմպիական չեմպիոն Ռեյ Հիգուչիի հետ

Հայ ըմբիշ Արսեն Հարությունյանին ԱՄՆ-ում բարձրակարգ դիմակայություն է սպասվում։ Հունիսի 13-ին Սենթ Լուիսում կայանալիք RAF 10 մրցաշարում նա ազատ ոճի ըմբշամարտի գոտեմարտ կանցկացնի ճապոնացի Ռեյ Հիգուչիի հետ՝ գործող օլիմպիական չեմպիոնի և համաշխարհային ըմբշամարտի ամենավառ ներկայացուցիչներից մեկի։ Գոտեմարտի անցկացման մասին հայտնել է Real American Freestyle կազմակերպությունը։

Հարությունյանի համար այս հանդիպումը հատկապես սկզբունքային կլինի։ Հայ ըմբիշը նախկինում արդեն երկու անգամ հանդիպել է Հիգուչիին խոշոր միջազգային մրցաշարերում, և երկու դեպքում էլ հաղթանակը մնացել է ճապոնացուն։

2022 թվականին աշխարհի առաջնությունում Հիգուչին վաղաժամ հաղթանակ տարավ Հարությունյանի նկատմամբ՝ 10:0 հաշվով։ Սակայն մեկ տարի անց նրանց դիմակայությունը լրիվ այլ ընթացք ունեցավ։ 2023 թվականի աշխարհի առաջնությունում ճապոնացի ըմբիշը կրկին ուժեղ գտնվեց, բայց գոտեմարտը վերածվեց իսկական թրիլերի և ավարտվեց Հիգուչիի հաղթանակով՝ 16:14 հաշվով։

Այժմ Արսեն Հարությունյանը հնարավորություն կունենա ռևանշի հասնել RAF 10 մրցաշարի շրջանակում։ Հայ ըմբիշի համար սա ոչ միայն կարգավիճակային գոտեմարտ է օլիմպիական չեմպիոնի հետ, այլ նաև հնարավորություն՝ կրկին ստուգելու իրեն աշխարհի ուժեղագույն թեթև քաշայիններից մեկի ֆոնին։

Երկու ըմբիշների համար էլ սա կլինի դեբյուտ RAF լիգայում։

Սենթ Լուիսում կայանալիք մրցաշարը խոստանում է լինել Real American Freestyle-ի օրացույցի ամենաաստղային իրադարձություններից մեկը։ Նույն երեկոյի ընթացքում սպասվում են նաև հայտնի MMA մարտիկների ելույթներ․ Արման Ծառուկյանը պետք է հանդիպի Թոնի Ֆերգյուսոնի հետ, իսկ Խամզաթ Չիմաևը՝ Դիլոն Դենիսի։

RAF 10-ը կանցկացվի հունիսի 13-ին Սենթ Լուիսի Chaifetz Arena մարզահամալիրում։ Հայ երկրպագուների համար երեկոյի գլխավոր իրադարձությունը կլինի հենց Արսեն Հարությունյան — Ռեյ Հիգուչի գոտեմարտը՝ դիմակայություն, որտեղ Հարությունյանը հնարավորություն կունենա փոխելու ճապոնացի չեմպիոնի հետ անձնական հանդիպումների պատմությունը։