Հայկական դերբի Սան Պաուլոյում. Ավանեսյանն ու Չարաևան կխաղան քառորդ եզրափակիչի ուղեգրի համար

Հայաստանի երկու ներկայացուցիչներ՝ Էլինա Ավանեսյանն ու Ալինա Չարաևան, դուրս են եկել Սան Պաուլոյի հարդ ծածկույթով կորտերում անցկացվող WTA 250 կարգի մրցաշարի 1/8 եզրափակիչ։

Այսօր Ալինա Չարաևան (WTA 133) ավարտեց առաջին շրջանի՝ անձրևի պատճառով ավելի վաղ ընդհատված հանդիպումը Չինաստանի ներկայացուցիչ Յու Սյաոդիի (WTA 207) դեմ։ Հայ թենիսիստուհին կամային հաղթանակ տարավ երեք սեթում՝ 3:6, 7:6 (7:5), 6:3 հաշվով։

Հատկապես լարված ստացվեց երկրորդ սեթի վերջնամասը։ 5:6 հաշվի ժամանակ Չարաևան ընդունում էր մրցակցուհու մատուցումը, իսկ Յու Սյաոդին մատուցում էր հանդիպումը հաղթանակով ավարտելու համար։ Ալինան կարողացավ բրեյք կատարել, սեթը տեղափոխել թայ-բրեյք և հաղթել այն 7:5 հաշվով։

Անձրևի պատճառով հերթական դադարից հետո թենիսիստուհիները շարունակեցին հանդիպումը։ Վճռորոշ երրորդ սեթում Չարաևան առավելության հասավ՝ 6:3, և նվաճեց հաջորդ փուլ դուրս գալու ուղեգիրը։

Հիշեցնենք, որ մեկ օր առաջ Հայաստանի մեկ այլ ներկայացուցիչ՝ Էլինա Ավանեսյանը (WTA 155), հաջողությամբ մեկնարկել էր Բրազիլիայում անցկացվող մրցաշարում։ 1/16 եզրափակիչում նա երկու սեթում հաղթել էր արգենտինացի Խուլիա Ռիերային (WTA 144)՝ 6:2, 6:4 հաշվով։

Այժմ 1/8 եզրափակիչում Ավանեսյանն ու Չարաևան կմրցեն միմյանց դեմ։ Հայկական դիմակայության հաղթողը դուրս կգա Սան Պաուլոյի WTA 250 մրցաշարի քառորդ եզրափակիչ։

Այսպիսով, Հայաստանը մրցաշարի 1/4 եզրափակիչում երաշխավորված կունենա առնվազն մեկ ներկայացուցիչ։