Արման Ծառուկյանը բացահայտել է Ռուֆիի դեմ մենամարտի ծրագիրը և նշել իր անկյունում լինելու աստղային կազմը

UFC-ի հայ մարտիկ Արման Ծառուկյանը պատմել է բրազիլացի Մաուրիսիո Ռուֆիի դեմ առաջիկա մենամարտին իր նախապատրաստության մասին։ Մենամարտը կկայանա սեպտեմբերի 19-ին Լոս Անջելեսում՝ UFC 331 մրցաշարի շրջանակում։ Ծառուկյանը նշել է, թե ովքեր են լինելու իր անկյունում, ներկայացրել է մարտավարական ծրագիրը և հաստատել, որ հաղթանակը պետք է իրեն ճանապարհ բացի դեպի չեմպիոնական մենամարտ։

Ծառուկյանի սեկունդանտներից մեկը կլինի հայկական ծագում ունեցող լեգենդար քիքբռնցքամարտիկ Ջորջո (Գևորգ) Պետրոսյանը։ Արմանի անկյունում նրա հետ միասին կլինեն նաև Խամզատ Չիմաևը և մարզիչ Մարկոս «Պարումպա» դա Մատան։ Միևնույն ժամանակ, Ռոման Կալանթարյանն այս անգամ մենամարտի ընթացքում թիմի կազմում չի լինի։

Խոսելով առաջիկա մրցակցի մասին՝ Ծառուկյանն ընդգծել է, որ չի պատրաստվում թերագնահատել Ռուֆիին։ Արմանի խոսքով՝ բրազիլացու գլխավոր ուժեղ կողմերն են կանգնած դիրքում աշխատանքը, ոչ ստանդարտ կոմբինացիաներն ու ծանր հարվածները։

Հենց այդ պատճառով Ծառուկյանը մտադիր է շեշտը դնել ըմբշամարտում ունեցած իր առավելության վրա։ Հայ մարտիկը նշել է, որ Ռուֆին լավ է զգում տարածությունն ու ժամանակը, շատ է շարժվում և կարող է անսպասելի հարվածներ հասցնել տարբեր անկյուններից։ Այդ պատճառով Ծառուկյանի խնդիրն է նախ մրցակցին պարտադրել ըմբշամարտ, իսկ հետո արդեն ավելի ակտիվ մտնել կանգնած դիրքում հարվածային փոխանակումների մեջ։

Մենամարտին առանձնահատուկ նշանակություն է հաղորդում նաև դրա հնարավոր ազդեցությունը թեթև քաշային կարգի չեմպիոնական մրցավազքի վրա։ Ծառուկյանը հայտնել է, որ UFC-ի ներկայացուցիչներն արդեն իր հետ քննարկել են հետագա ծրագրերը․ Ռուֆիի նկատմամբ հաղթանակի դեպքում նա ակնկալում է 2027 թվականի սկզբին մենամարտել չեմպիոնական գոտու համար։

Միևնույն ժամանակ Արմանն ընդգծել է, որ այժմ ամբողջությամբ կենտրոնացած է առաջիկա մրցակցի վրա և չի ցանկանում իրադարձություններից առաջ ընկնել։

UFC-ի պաշտոնական կայքի համաձայն՝ Ծառուկյան — Ռուֆի հանդիպումը կլինի UFC 331 մրցաշարի հինգ ռաունդանոց համագլխավոր մենամարտը։ Արմանը թեթև քաշային կարգի դասակարգման երկրորդ հորիզոնականում է, իսկ Ռուֆին՝ յոթերորդ։ Ծառուկյանը մենամարտին մոտենում է հինգ անընդմեջ հաղթանակների շարքով, իսկ բրազիլացին իր վերջին մենամարտում նոկաուտի է ենթարկել Մայքլ Չենդլերին։

UFC 331 մրցաշարը կկայանա սեպտեմբերի 19-ին Լոս Անջելեսի Crypto.com Arena-ում։ Երեկոյի գլխավոր մենամարտում թեթևագույն քաշային կարգի չեմպիոնական ռևանշում կհանդիպեն Ջոշուա Վանն ու Ալեշանդրե Պանտոժան։