Նարեկ Գրիգորյանի գործակալը բացատրել է, թե ինչու ֆուտբոլիստը չի հայտնվում «Ֆարուլի» հայտացուցակում
- Հեղինակ: Vahe Hakobyan
- Sportaran
Հայաստանի ազգային հավաքականի կիսապաշտպան Նարեկ Գրիգորյանի գործակալ Հրաչյա Ղամբարյանը պատմել է, թե ինչու 25-ամյա ֆուտբոլիստն արդեն ավելի քան մեկ ամիս չի ընդգրկվում ռումինական «Ֆարուլի» հայտացուցակում։
Գործակալի խոսքով՝ իրավիճակը կապված է ֆուտբոլիստի պայմանագրի և հնարավոր տրանսֆերի հետ։
— Նարեկի պայմանագիրը «Ֆարուլի» հետ նախատեսված էր մինչև այս տարվա հունիսը, սակայն ակումբն իրավունք ուներ այն երկարաձգել ևս մեկ տարով՝ բարելավելով որոշ պայմաններ։ «Ֆարուլն» օգտվեց այդ իրավունքից։
Այնուհետև Գրիգորյանին առաջարկեցին նոր՝ ավելի երկարաժամկետ պայմանագիր, որը պետք է ուժի մեջ մտներ 2027 թվականին։ Մենք որոշեցինք մերժել այն, քանի որ առաջարկը նպատակահարմար չէր։
Հաջորդ իսկ օրը ակումբը որոշեց անհապաղ վաճառել Նարեկի տրանսֆերը։ Միևնույն ժամանակ նրանք որոշեցին Գրիգորյանին խաղաժամանակ չտրամադրել։
Նարեկը վնասվածք չունի և ամեն օր մարզվում է։
Այժմ տարբեր երկրների ակումբների հետ տրանսֆերի շուրջ բանակցություններ են ընթանում,— Ղամբարյանի խոսքերն է փոխանցում Libero-ն։
Ընթացիկ մրցաշրջանում Գրիգորյանը Ռումինիայի առաջնությունում մասնակցել է ընդամենը մեկ հանդիպման՝ առաջին տուրում «Ունիվերսիտատյա Կլուժի» դեմ։ Հաջորդ հինգ տուրերում Հայաստանի հավաքականի վինգերը չի ընդգրկվել «Ֆարուլի» հայտացուցակում։