Աբդուլռաշիդ Սադուլաևը պայմանագիր է ստորագրել RAF Wrestling լիգայի հետ

Ազատ ոճի ըմբշամարտի կրկնակի օլիմպիական չեմպիոն և աշխարհի վեցակի չեմպիոն Աբդուլռաշիդ Սադուլաևը բացառիկ պայմանագիր է ստորագրել ամերիկյան RAF Wrestling (Real American Freestyle) լիգայի հետ։

Պայմանագրի ստորագրումը պաշտոնապես հայտարարել է հենց պրոմոուշենը.

«Աշխարհում ազատ ոճի լավագույն ըմբիշների համար կա միայն մեկ տուն՝ և դա RAF-ն է։ Աբդուլռաշիդ Սադուլաևը բացառիկ պայմանագիր է ստորագրել RAF-ի հետ՝ պրոֆեսիոնալ ըմբշամարտում մրցելու համար։ Մեզ համար մեծ պատիվ է ողջունել գորգ դուրս եկած ամենամեծ մարզիկներից մեկին», — նշված է լիգայի հայտարարության մեջ։

RAF լիգան համեմատաբար վերջերս է սկսել մրցաշարեր անցկացնել ԱՄՆ-ում և իրեն դիրքավորում է որպես պրոֆեսիոնալ ըմբշամարտի պրոմոուշեն, որի ձևաչափը ոճապես հիշեցնում է UFC-ը, սակայն հիմնական շեշտը դրված է հենց ազատ ոճի ըմբշամարտի վրա։ RAF-ի շրջանակներում օլիմպիական ըմբիշներն ու ՄՄԱ-ի աստղերը մրցում են դասական ըմբշամարտի մենամարտերում։ Պրոմոուշենը ունի սեփական չեմպիոնական գոտիներ տարբեր քաշային կարգերում։

Վերջին մրցաշարը՝ RAF 5-ը, կայացել է հունվարի 10-ին Ֆլորիդայում։ Մրցաշարին մասնակցել է UFC-ի հայ մարտիկ Արման Ծառուկյանը, ինչպես նաև մի շարք այլ հայտնի մարզիկներ։

Հաջորդ շոուն՝ RAF 6-ը, կանցկացվի փետրվարի 28-ին Արիզոնայում։ Արդեն հայտնի է, որ մրցաշարի քարդում կմասնակցեն UFC-ի նախկին աստղերը․ Հենրի Սեհուդոն կմրցի Ուրայա Ֆեյբերի հետ, Մուհամմադ Մոկաևը՝ Բրայս Մերեդիթի, իսկ օլիմպիական մրցանակակիր Ֆրանկ Չամիզոն կմենամարտի Քիգան Օ’Թուլի հետ։

Սպասվում է, որ հենց RAF 6 մրցաշարում կկայանա Աբդուլռաշիդ Սադուլաևի նոր պրոֆեսիոնալ լիգայում դեբյուտը, որը կդառնա երեկոյի գլխավոր իրադարձություններից մեկը և կգրավի ազատ ոճի ըմբշամարտի երկրպագուների ուշադրությունը ամբողջ աշխարհում։