Հայաստանի Մ18 կանանց հավաքականը Եվրոբասկետի մեկնարկում ջախջախեց Ջիբրալթարին

Հայաստանի մինչև 18 տարեկան կանանց հավաքականը, ինչպես և տղամարդկանց թիմը, հաղթանակով մեկնարկեց Կոսովոյում անցկացվող Եվրոպայի առաջնության C դիվիզիոնում։

Մեկնարկային խաղում հայ բասկետբոլիստուհիները վստահ հաղթանակ տարան Ջիբրալթարի հավաքականի նկատմամբ՝ 83։36 հաշվով։

Հայաստանի հավաքականի կազմում ամենաարդյունավետը Նիժնի Նովգորոդը ներկայացնող Լիլիթ Գևորկովան էր։ Նա վաստակեց 18 միավոր, կատարեց 7 անդրադարձ, 3 արդյունավետ փոխանցում և 2 խլում։

Հաջորդ հանդիպումը Հայաստանի հավաքականը կանցկացնի հուլիսի 22-ին՝ Վրաստանի հավաքականի դեմ։

Ավելի վաղ Հայաստանի Մ18 տղամարդկանց հավաքականը նույնպես հաջողությամբ էր մեկնարկել մրցաշարում՝ 82։62 հաշվով հաղթելով Ջիբրալթարի թիմին։