Վահե Գևորգյան. «Մենք հարգում ենք ՉՖՌ Կլուժին, բայց ոչ մեկից չենք վախենում»

«Ալաշկերտի» գլխավոր մարզիչ Վահե Գևորգյանը պատասխանել է լրագրողների հարցերին՝ Կոնֆերենցիաների լիգայի որակավորման երկրորդ փուլի՝ ռումինական ՉՖՌ Կլուժի դեմ առաջին հանդիպումից առաջ։ Խաղը կկայանա հուլիսի 23-ին՝ Երևանում։

Հայկական թիմի գլխավոր մարզիչը խոսել է հանդիպման նախապատրաստության մասին, գնահատել մրցակցի ուժեղ կողմերը և երկրպագուներին կոչ արել մարզադաշտում աջակցել «Ալաշկերտին»։

— Որքանո՞վ է թիմն արդեն հաղթահարել նախորդ փուլի էյֆորիան, և պատրա՞ստ է արդյոք առաջիկա դիմակայությանը։

— Նախևառաջ, օգտվելով առիթից, ցանկանում եմ շնորհակալություն հայտնել այն երկրպագուներին, որոնք այդքան երկար ճանապարհ անցան և աջակցեցին մեզ Ղազախստանում։ Խնդրում եմ նրանց ներկա լինել նաև վաղվա խաղին։ Հուսով եմ՝ նախորդ հանդիպման դրամատիկ ավարտն ավելի շատ երկրպագուների կբերի մարզադաշտ։

Ինչ վերաբերում է հարցին, համաձայն եմ՝ հաճախ նման հույզերից հետո թիմի համար դժվար է վերականգնվել, և դա կարող է ազդել հաջորդ հանդիպման վրա։ Սակայն ֆուտբոլը զգացմունքային խաղ է, և առանց հույզերի հնարավոր չէ։ Ամբողջ շաբաթ հանգիստ աշխատել ենք։ Մենք միշտ խաղում ենք կրքով և զգացմունքներով, ու վստահ եմ, որ վաղը նույնպես զգացմունքային հանդիպում է լինելու։

— Ի՞նչ կասեք ՉՖՌ Կլուժի մասին։ Հավանաբար դիտել եք չորս տարի առաջ «Փյունիկի» դեմ նրանց հանդիպումները։ Ընդհանրություններ կա՞ն այն ժամանակվա և ներկայիս ՉՖՌ Կլուժի միջև։

— «Փյունիկի» դեմ հանդիպումները բավական վաղուց են կայացել։ Այդ ժամանակից ի վեր շատ բան է փոխվել, այդ թվում՝ մարզիչը, ուստի ես մանրամասն չեմ ուսումնասիրել հենց այդ խաղերը։ Մենք շատ լավ վերլուծել ենք ներկայիս մրցակցին։ ՉՖՌ Կլուժն արդեն անցկացրել է Ռումինիայի առաջնության առաջին հանդիպումը։

Սա շատ ուժեղ թիմ է, և բոլորս հիանալի գիտենք, թե ինչ հարուստ պատմություն ունի ակումբը։ Մենք հարգում ենք մրցակցին, բայց ոչ մեկից չենք վախենում։

— ՉՖՌ Կլուժն իսկապես հարուստ պատմություն ունի․ թիմը հանդես է եկել նույնիսկ Չեմպիոնների լիգայի խմբային փուլում։ Սակայն վերջին անգամ եվրագավաթների հիմնական փուլ է հասել 2022/23 մրցաշրջանում՝ Կոնֆերենցիաների լիգայում։ Կարելի՞ է ասել, որ այժմ ակումբը անցումային փուլում է։ Որքանո՞վ է այն հարմար մրցակից «Ալաշկերտի» համար, և խաղաոճով հայկական ո՞ր թիմին է նման։

— Դժվար է ՉՖՌ Կլուժին համեմատել հայկական թիմերի հետ, քանի որ եվրագավաթներում յուրաքանչյուր մրցակից ունի իր յուրահատուկ խաղաոճը։ Բայց եթե խոսենք հենց խաղային ձեռագրի մասին, ապա ես նրանց կհամեմատեի «Ուրարտուի» հետ։

Գնդակին տիրելիս նրանք փորձում են խաղային քաոս ստեղծել, ազատ գոտիներ են փնտրում, սիրում են վերահսկել գնդակը և դավանում են տոտալ ֆուտբոլ՝ դիրքերի հաճախակի փոփոխությամբ։ Հետաքրքիր թիմ է։

— Թիմը պատրա՞ստ է հանդիպմանը։ Վնասվածք ունեցող ֆուտբոլիստներ կա՞ն։

— Մենք լիովին պատրաստ ենք հանդիպմանը։

— ՉՖՌ Կլուժը նոր է սկսել մրցաշրջանը և առաջնությունում ընդամենը մեկ հանդիպում է անցկացրել, մինչդեռ «Ալաշկերտն» արդեն երկու խաղ է անցկացրել եվրագավաթներում։ Կարելի՞ է ասել, որ ձեր թիմն ավելի լավ խաղակցված կլինի։

— Մենք ընդամենը մեկ պաշտոնական հանդիպում ավելի ենք անցկացրել, բայց հուսով եմ՝ դա կօգնի մեզ։ Խաղը ցույց կտա, թե թիմերը որքանով են պատրաստ ֆունկցիոնալ և ֆիզիկական առումով։ Հուսով եմ՝ ավելի պատրաստ կլինենք մենք։

— Վաղվա հանդիպման ժամանակ ձեզ համար ո՞րն է ավելի կարևոր՝ գոլ բաց չթողնե՞լը, թե՞ անպայման գոլ խփելը։

— Ամենակարևորը հաղթելն է։

«Ալաշկերտը» Կոնֆերենցիաների լիգայում ելույթը սկսել է որակավորման առաջին փուլից։ Ղազախական «Ելիմայի» դեմ երկու հանդիպումներն էլ ավարտվել են ոչ-ոքի՝ 1։1 Երևանում և 2։2 Սեմեյում։

Պատասխան խաղում հայկական թիմը փրկվել է պարտությունից՝ հաշիվը հավասարեցնելով 120+1-րդ րոպեին, այնուհետև հաղթել է հետխաղյա 11-մետրանոցների շարքում՝ 6։5 հաշվով։

ՉՖՌ Կլուժը պայքարի մեջ է մտնում որակավորման երկրորդ փուլից։ Երևան մեկնելուց առաջ ռումինական ակումբը երկրի նոր առաջնությունում անցկացրել է իր առաջին հանդիպումը՝ արտագնա խաղում 1։2 հաշվով պարտվելով «Օցելուլին»։