Թոմաս Ադորյանը օգնեց «Բանֆիլդին» հաղթել «Սարմիենտոյին»

Հայ կիսապաշտպան Թոմաս Ադորյանը գոլային փոխանցման հեղինակ է դարձել Արգենտինայի Կլաուսուրայի երկրորդ տուրի խաղում, որտեղ «Բանֆիլդը» 3:2 հաշվով հաղթել է «Սարմիենտոյին»։

24-ամյա ֆուտբոլիստը խաղը սկսել է մեկնարկային կազմում և խաղադաշտում անցկացրել 83 րոպե։ Հանդիպման արդյունքներով SofaScore վիճակագրական հարթակը նրա խաղը գնահատել է 8,2 միավորով։

Գոլային փոխանցումից բացի՝ Ադորյանը նաև 11-մետրանոց է վաստակել, երկու անգամ հարվածել է դարպասին, կատարել չորս գնդակի խլում և երկու անգամ կասեցրել մրցակցի փոխանցումը։ Կիսապաշտպանը նաև հաղթել է 12 մենապայքարից ութում։ Հանդիպման ընթացքում Թոմասը գործել է հարձակման երկու եզրերում։

Ավելի վաղ Ադորյանը երկու հանդիպում է անցկացրել Հայաստանի ազգային հավաքականի կազմում։ Երկու անգամ էլ նա խաղադաշտ է դուրս եկել 2025 թվականի հունիսին կայացած ընկերական հանդիպումներում, որից հետո այլևս չի հրավիրվել ազգային թիմ։

Մրցաշրջանի հաջող մեկնարկը կարող է կրկին գրավել Հայաստանի հավաքականի մարզչական շտաբի ուշադրությունը։ Ադորյանն արդեն երկրորդ հանդիպումն անընդմեջ բարձր մակարդակի խաղ է ցուցադրում ակումբում և ամրապնդվում է «Բանֆիլդի» մեկնարկային կազմում։