Սանդրո Պերկովիչ․ «Պատասխան խաղում «Նոան» ավելի լավ կխաղա»

Հայկական «Նոայի» գլխավոր մարզիչ Սանդրո Պերկովիչն ամփոփել է Կոնֆերենցիաների լիգայի որակավորման երկրորդ փուլի՝ մոլդովական «Զիմբրուի» դեմ առաջին հանդիպման արդյունքները։

Քիշնևում կայացած հանդիպումն ավարտվել է ոչ-ոքի՝ 1։1 հաշվով։ Տանտերերը հաշիվը բացել են 43-րդ րոպեին՝ Շտեֆան Բիցայի դիպուկ հարվածից հետո։ «Նոան» հանդիպման մեծ մասում տիրել է նախաձեռնությանը, ավելի հաճախ է գրոհել և վաստակել է ինը անկյունային հարված։ Դրանցից մեկը 88-րդ րոպեին հանգեցրել է պատասխան գոլի։

Խաղից հետո Պերկովիչը գնահատել է իր թիմի գործողությունները, խոսել նորեկների հարմարվելու գործընթացի մասին և բացատրել որոշ կադրային որոշումներ։

Սանդրո Պերկովիչի մամուլի ասուլիսը «Զիմբրու» — «Նոա» 1։1 հանդիպումից հետո

Սանդրո Պերկովիչի ներածական խոսքը․

— Սա մրցաշրջանի առաջին հանդիպմանը բնորոշ դասական խաղ էր։ Մենք գիտեինք, որ «Զիմբրուն» լավ թիմ է՝ փորձառու և բարձրակարգ ֆուտբոլիստներով։ Մենք պարզ տակտիկական սխալներ էինք թույլ տալիս, սակայն ընդհանուր առմամբ վերահսկում էինք խաղը։

Մենք հաշիվը բացելու հարյուր տոկոսանոց հնարավորություն ունեինք, սակայն մի քանի րոպե անց ինքներս գոլ բաց թողեցինք։ Բարեբախտաբար, հանդիպման վերջնամասում մեզ հաջողվեց հավասարեցնել հաշիվը։

Ցանկանում եմ շնորհակալություն հայտնել բոլոր երկրպագուներին, որոնք եկել էին արտագնա խաղում մեզ աջակցելու։ Նաև բոլորին կոչ եմ անում հաջորդ հինգշաբթի ներկա գտնվել մեր տնային հանդիպմանը։ Մեզ անհրաժեշտ է նրանց էներգիան։

— Ինչո՞ւ գրոհների եզրափակիչ փուլում թիմին անընդհատ ինչ-որ բան չէր բավականացնում։

— Լավ հարց է։ Իրոք, գրոհներն ավարտին հասցնելու հարցում խնդիրներ ունեինք։ Մեզ պակասում էին ստեղծագործականությունն ու վստահությունը, իսկ երբեմն նաև սխալ որոշումներ էինք ընդունում։

Կարծում եմ՝ նման իրավիճակներում պետք է ավելի համարձակ գործել, ավելի շատ ռիսկի դիմել և ավելի շատ մենապայքարներ հաղթել։ Ցավոք, մեզ մոտ ամեն ինչ չստացվեց, սակայն, այնուամենայնիվ, կարողացանք գոլային մի քանի իսկապես լավ պահ ստեղծել։

Ուզում եմ նաև ընդգծել, թե ինչպես էինք վերահսկում խաղը և որքան հաճախ էինք գրոհում։

— Գոռ Մանվելյանը և Հովհաննես Համբարձումյանը լավ մտան խաղի մեջ։ Ինչո՞ւ նրանք այդքան ուշ հայտնվեցին խաղադաշտում։ «Նոան» շատ անկյունայիններ ուներ, և հնարավոր է՝ Մանվելյանն ավելի արդյունավետ օգներ դրանք իրացնել, եթե ավելի շուտ դուրս գար խաղադաշտ։

— Այո՛, դուք ճիշտ եք, նրանք ուժեղացրին մեր խաղը։ Շատ ուրախ ենք, որ նման ֆուտբոլիստներ ունենք։

Մենք ցանկանում էինք հանդիպումը սկսել Բոակյեի մասնակցությամբ, այդ պատճառով Համբարձումյանը մնաց պահեստայինների նստարանին։ Ամեն դեպքում, ես գոհ եմ խաղին մասնակցած բոլոր ֆուտբոլիստներից։

Մանվելյանի ուժեղ կողմերից մեկն անկյունայիններից կատարած փոխանցումներն են։ Նույնիսկ խաղադաշտում անցկացրած կարճ ժամանակահատվածում նա անկյունային կատարելու մի քանի հնարավորություն ունեցավ, և այդ փոխանցումներից մեկն ավարտվեց գոլով։

Ես գոհ եմ այն բանից, թե ինչպես բոլոր ֆուտբոլիստներն արձագանքեցին հանդիպման ընթացքում կատարված փոփոխություններին։

— Այս խաղում մի քանի ֆուտբոլիստներ նորամուտը նշեցին «Նոայի» կազմում։ Գո՞հ եք նորեկների մարզավիճակից և թիմում նրանց հարմարվելու գործընթացից, թե՞ նրանք դեռ աճելու տեղ ունեն։

— Մեզ ժամանակ է անհրաժեշտ, որպեսզի բոլոր նորեկները լիովին հարմարվեն թիմին և մեր պահանջներին։ Այս ամռանը մենք կորցրել ենք մոտ 15 ֆուտբոլիստի։ Կազմը գրեթե կիսով չափ փոխվել է, այդ պատճառով ժամանակ է անհրաժեշտ թիմային խաղը կարգավորելու համար։

Միևնույն ժամանակ ես գոհ եմ, թե ինչպես են ֆուտբոլիստներն աշխատում և դրսևորում իրենց։ Մենք գիտեինք, որ հանդիպումը ծանր է լինելու։ «Զիմբրուն» ունի իր խաղաոճը, բացի այդ՝ մրցակիցն արդեն սկսել է մրցաշրջանն ազգային առաջնությունում, մինչդեռ մեզ համար սա առաջին պաշտոնական հանդիպումն էր։

Կարծում եմ՝ օրեցօր ավելի լավն ենք դառնալու։

— Մոլդովայում և Հայաստանում շատերը «Նոային» համարում են այս զույգի ֆավորիտը։ Ոչ բոլոր մարզիչներին է դուր գալիս, երբ իրենց թիմին ֆավորիտ են անվանում, քանի որ դա կարող է լրացուցիչ ճնշում առաջացնել։ Սակայն լինո՞ւմ են իրավիճակներ, երբ այդ կարգավիճակը, ընդհակառակը, օգնում է։

— Կարծում եմ՝ նման բաներն ավելի շատ կարևոր են երկրպագուների համար։ Ինձ, մարզչական շտաբի և ֆուտբոլիստների համար գլխավորն ամբողջ 90 րոպեն խաղալն ու սեփական աշխատանքի վրա լիովին կենտրոնանալն է։

Մենք կվերլուծենք այսօրվա հանդիպումը և կշարունակենք կատարելագործվել։ Կպատրաստվենք պատասխան խաղին և, հուսով եմ, սեփական հարկի տակ կտոնենք հաջորդ փուլ դուրս գալը։

— Այսօր մի քանի վիճահարույց մրցավարական դրվագներ եղան։ Դուք արդեն սովոր եք խաղալ VAR համակարգի կիրառմամբ։ Որքանո՞վ էր դժվար առանց մրցավարների տեսաօգնության համակարգի, որը Կոնֆերենցիաների լիգայի այս փուլում չի օգտագործվում։

— Չեմ ցանկանում մեկնաբանել մրցավարների աշխատանքը։ Անկեղծ ասած՝ ինձ դուր է գալիս VAR-ը, սակայն վերջին շրջանում համակարգը չափազանց մեծ ազդեցություն է ունենում խաղադաշտում ընդունվող որոշումների վրա։

Միևնույն ժամանակ ես ավելի շատ հին դպրոցի ֆուտբոլի կողմնակից եմ, երբ վերջնական որոշումն ընդունում է խաղադաշտում գտնվող մրցավարը։

— Նախորդ մրցաշրջանում կենտրոնական պաշտպանների հիմնական զույգը կազմում էին Սերգեյ Մուրադյանը և Պաբլո Սանտոս Սայնտինին։ Ինչո՞ւ Մուրադյանն այսօր չխաղաց, և ինչպե՞ս կգնահատեք նորեկ Սթոուն Մամբոյի ելույթը։

— Սերգեյ Մուրադյանը թիմի ամենակարևոր ֆուտբոլիստներից մեկն է։ Նախորդ մրցաշրջանի վերջում նա ծանր վնասվածք էր ստացել։ Նախամրցաշրջանային պատրաստության ընթացքում նա հնարավորություն չունեցավ լիարժեք աշխատելու թիմի հետ։ Նա բաց թողեց նաև տակտիկական պատրաստության զգալի մասը։

Սերգեյը միայն վերջերս է վերադարձել լիարժեք մարզումներին։ Ես շատ գոհ եմ նրա վերականգնման ընթացքից։ Կարծում եմ՝ շուտով նա լիովին պատրաստ կլինի խաղալու։

Մուրադյանն իր տարիքի լավագույն ֆուտբոլիստներից մեկն է։ Հուսով եմ՝ այս մրցաշրջանում նա ավելի մեծ ջանքեր կգործադրի՝ առաջընթացը շարունակելու համար։ Ես նրա հետ կապված մեծ ծրագրեր ունեմ։

Այսօր ընտրեցի Սայնտինի — Մամբո զույգը։ Թե ինչպես կլինի պատասխան խաղում, կտեսնենք։

— Արամ Համոյանը լավ անցկացրեց առաջին խաղակեսը, սակայն ընդմիջմանը փոխարինվեց։ Ինչո՞վ էր պայմանավորված այդ որոշումը։

— Արամը լավ անցկացրեց իրեն հատկացված ժամանակը։ Նրա փոխարինումը պայմանավորված էր բացառապես տակտիկական նկատառումներով։

— Այսօր «Նոան» ավելի շատ էր տիրում գնդակին, քան մրցակիցը։ Ձեր թիմի համար ավելի հարմա՞ր է խաղալ առաջին, թե՞ երկրորդ համարով։

— Ինձ դուր է գալիս, երբ թիմը տիրում է գնդակին։ «Նոան» այնպիսի ակումբ է, որը պետք է գերիշխի խաղադաշտում։

Այսօր մենք բազմաթիվ պահեր ստեղծեցինք, շատ հարվածներ կատարեցինք և մեծ քանակությամբ անկյունայիններ վաստակեցինք։ Այո՛, մեզ չհաջողվեց օգտագործել մեր բոլոր հնարավորությունները, սակայն սա մրցաշրջանում մեր առաջին պաշտոնական խաղն էր։

Ընդհանուր առմամբ ես գոհ եմ թիմի ելույթից և վստահ եմ, որ պատասխան հանդիպումն ավելի լավ կանցկացնենք։