«Սանդերլենդը» պատրաստ էր 20 մլն եվրո վճարել Սպերցյանի համար
- Հեղինակ: Vahe Hakobyan
- Sportaran
Անգլիական «Սանդերլենդը» դիտարկում էր «Կրասնոդարի» նախկին ավագ Էդուարդ Սպերցյանին ձեռք բերելու հնարավորությունը։ Այս մասին իր տելեգրամյան ալիքում հայտնել է լրագրող Անար Իբրահիմովը։
Աղբյուրի տեղեկություններով՝ անգլիական ակումբի ներկայացուցիչները կապ են հաստատել ֆուտբոլիստի ընտանիքի հետ և պատրաստ էին նրա տրանսֆերի համար առաջարկել 20 մլն եվրո ֆիքսված գումար։ Հնարավոր գործարքի շուրջ բանակցությունները տեղի են ունեցել մայիսի վերջին, իսկ կողմերի շահերը ներկայացրել է շվեյցարացի գործակալ Քրիստոֆ Գրաֆը։
Նշվում է, որ «Սանդերլենդի» մեծամասնական սեփականատեր Կիրիլ Լուի-Դրեյֆուսը լրջորեն դիտարկում էր Սպերցյանի թեկնածությունը։ Միևնույն ժամանակ անգլիական ակումբի առաջարկած անձնական պայմանները զգալիորեն ավելի համեստ էին, քան նրանք, որոնք ֆուտբոլիստը հետագայում ստացավ Սաուդյան Արաբիայում։ Աղբյուրի պնդմամբ՝ դա չէր անհանգստացնում խաղացողին։
Ի վերջո, «Սանդերլենդի» և «Կրասնոդարի» միջև ուղիղ բանակցություններ այդպես էլ չկայացան։ Իբրահիմովի տվյալներով՝ տրանսֆերի իրականացմանը խանգարել են հանգամանքներ, որոնք անմիջականորեն կապված չեն եղել ֆուտբոլի հետ։
Կիրիլ Լուի-Դրեյֆուսը ֆրանսիական «Մարսելի» նախկին սեփականատեր Ռոբեր Լուի-Դրեյֆուսի և գործարար Մարգարիտա Լուի-Դրեյֆուսի որդին է։ Նա «Սանդերլենդի» տնօրենների խորհրդի նախագահ է դարձել 23 տարեկանում։
Այս ամռանը Սպերցյանը «Կրասնոդարից» տեղափոխվեց Սաուդյան Արաբիայի «Ալ-Ահլի»՝ 21 մլն եվրոյի դիմաց, և ստորագրեց չորս տարվա պայմանագիր։ Ավելի վաղ Հայաստանի ազգային հավաքականի կիսապաշտպանի նկատմամբ հետաքրքրություն էր վերագրվում նաև Դորտմունդի «Բորուսիային», «Լացիոյին» և եվրոպական առաջատար առաջնությունների այլ ակումբների։
Հիշեցնենք, որ «Սանդերլենդում» հանդես է գալիս Հայաստանի ազգային հավաքականի հարձակվող Ֆինն Գերագուսյանը։