Ռազմիկ Եփրեմյանը հաղթեց ադրբեջանցի մրցակցին և դուրս եկավ Եվրոպայի Մ20 առաջնության եզրափակիչ
- Հեղինակ: Vahe Hakobyan
- Sportaran
Ազատ ոճի հայ ըմբիշ Ռազմիկ Եփրեմյանը դուրս եկավ Սկոպյեում ընթացող 2026 թվականի Եվրոպայի Մ20 առաջնության եզրափակիչ։
Մինչև 86 կգ քաշային կարգի կիսաեզրափակիչում Եփրեմյանը մրցեց Ադրբեջանի ներկայացուցիչ Մոհամմադ Աբասզադայի հետ։ Լարված գոտեմարտն ավարտվեց 1:1 հաշվով, սակայն լրացուցիչ ցուցանիշներով հաղթանակը շնորհվեց Հայաստանի ներկայացուցչին։
Եզրափակիչում Ռազմիկ Եփրեմյանի մրցակիցը կլինի Ռուսաստանը ներկայացնող Իսմայիլ Խանիևը։
Մինչև կիսաեզրափակիչ հասնելը հայ ըմբիշը երկու վստահ հաղթանակ էր տարել՝ մրցակիցներին ոչ մի միավոր չտալով։ 1/8 եզրափակիչում Եփրեմյանը 10:0 հաշվով հաղթել էր իսրայելցի Տոմեր Դրոժնյակին, իսկ քառորդ եզրափակիչում 11:0 հաշվով առավելության էր հասել Էստոնիայի ներկայացուցիչ Նիկոլայ Տարասովի նկատմամբ։
Հիշեցնենք, որ այսօր Եվրոպայի Մ20 առաջնության եզրափակիչում հանդես կգա նաև Հայաստանի ևս մեկ ներկայացուցիչ՝ Արեն Հայրապետյանը։ Մինչև 65 կգ քաշային կարգի վճռորոշ գոտեմարտում նա կմրցի Մոլդովայի ներկայացուցչի հետ։