«Փյունիկը» պայմանագիր է կնքել Մոզամբիկի հավաքականի վինգեր Վիտիի հետ

Մոզամբիկի հավաքականի 29-ամյա վինգեր Վիտինյեշ Շիմոյու Ժուաու Կեմբուն, որն առավել հայտնի է Վիտի անունով, դարձել է «Փյունիկի» ֆուտբոլիստ։

Նա հայկական ակումբ է տեղափոխվել պորտուգալական «Նասիոնալից», որի կազմում հանդես է եկել երկար տարիներ։ Պորտուգալիայի Պրիմեյրա լիգայում Վիտին անցկացրել է 108 հանդիպում, խփել 4 գոլ և կատարել 11 գոլային փոխանցում։

Միջազգային մակարդակում «Փյունիկի» նորեկը Մոզամբիկի ազգային հավաքականի կազմում անցկացրել է 45 հանդիպում՝ դառնալով 4 գոլի և 6 գոլային փոխանցման հեղինակ։

Ֆուտբոլիստի հասակը 177 սանտիմետր է, իսկ տրանսֆերային արժեքը գնահատվում է 500 հազար եվրո։

Վիտին արդեն ընդգրկվել է «Փյունիկի»՝ Կոնֆերենցիաների լիգայի հայտացուցակում և կկարողանա օգնել թիմին որակավորման երկրորդ փուլի՝ հունգարական «Դեբրեցենի» դեմ հանդիպումներում։