«Փյունիկը» նվազագույն հաշվով պարտվեց «Դեբրեցենին» Կոնֆերենցիաների լիգայի որակավորման առաջին խաղում

Երևանի «Փյունիկը» նվազագույն հաշվով պարտություն կրեց Կոնֆերենցիաների լիգայի որակավորման երկրորդ փուլի արտագնա խաղում։ Հունգարիայում Արտակ Օսեյանի գլխավորած թիմը 0։1 հաշվով զիջեց «Դեբրեցենին»։

Այս արդյունքը հայկական ակումբին հաջորդ փուլ դուրս գալու լավ հնարավորություններ է թողնում։ Պատասխան հանդիպումը կկայանա հուլիսի 30-ին՝ Երևանում։

Ընդհանուր առմամբ խաղն անցավ հավասար պայքարում։ Առաջին խաղակեսում «Փյունիկն» ավելի մոտ էր հաշիվը բացելուն, սակայն հյուրերին չհաջողվեց իրացնել ստեղծած հնարավորությունները։

Ընդմիջումից հետո «Դեբրեցենն» առաջ անցավ Ֆլորիան Ցիբլայի գեղեցիկ հեռահար հարվածի շնորհիվ։ Այդ գոլը միակը դարձավ հանդիպման ընթացքում և հաղթանակ պարգևեց հունգարական թիմին։

«Փյունիկը» հաշիվը հավասարեցնելու հնարավորություններ ուներ։ Երևանյան թիմը ստեղծեց մի քանի վտանգավոր պահ, իսկ Հովհաննես Հարությունյանի հարվածից հետո գնդակը դիպավ դարպասաձողին։

Այս հանդիպմանը «Փյունիկի» կազմում նորամուտը նշեց թիմի նոր եզրային հարձակվող Վիտին, որը նախկինում հանդես է եկել Պորտուգալիայի առաջնությունում։

Նշենք նաև, որ արդեն 28-րդ րոպեին վնասվածքի պատճառով խաղադաշտը հարկադրված լքեց Արտակ Դաշյանը։

«Փյունիկի» կազմը

Հենրի Ավագյան — Արտակ Դաշյան (28, Կայնուրգիոս), Միխայիլ Կովալենկո, Սերգեյ Վակուլենկո, Ֆիլիպե Ալմեյդա (57, Դարբինյան), Խամես Սանտոս — Կարլեն Հովհաննիսյան, Հովհաննես Հարությունյան (66, Վիտի), Սեադ Իսլամովիչ, Դանիիլ Կուլիկով (66, Գրիֆիթ) — Մոմո Յանսանե (66, Պիկիս)։