Հայաստանի հինգ ըմբիշներ գորգ դուրս կգան Բաքվում ընթացող Մ17 աշխարհի առաջնության երկրորդ օրը

Այսօր Բաքվում ընթացող հունահռոմեական ըմբշամարտի մինչև 17 տարեկանների աշխարհի առաջնության մրցումային երկրորդ օրը գորգ դուրս կգան Հայաստանի հավաքականի ևս հինգ ներկայացուցիչներ։

Նրանց թվում են Մ17 տարիքային խմբի աշխարհի և Եվրոպայի գործող չեմպիոն Ջանես Նազարյանը, ինչպես նաև Եվրոպայի փոխչեմպիոն Ալեքսան Շալջյանը։

Հայաստանի հավաքականի կազմը․

• մինչև 45 կգ՝ Վազգեն Վարդանյան,
• մինչև 51 կգ՝ Գևորգ Հարությունյան,
• մինչև 60 կգ՝ Արտուշ Պետրոսյան,
• մինչև 71 կգ՝ Ջանես Նազարյան,
• մինչև 92 կգ՝ Ալեքսան Շալջյան։

Հայ ըմբիշների առաջին մրցակիցները

Մինչև 45 կգ քաշային կարգի 1/8 եզրափակչում Վազգեն Վարդանյանը կմրցի ԱՄՆ ներկայացուցիչ Ռայլեն Ուաքսի հետ։

Մինչև 51 կգ քաշային կարգում հանդես եկող Գևորգ Հարությունյանը մրցաշարը կսկսի 1/8 եզրափակչից՝ հունգարացի Շանդոր Կուրդիի դեմ գոտեմարտով։

Մինչև 60 կգ քաշային կարգի 1/16 եզրափակչում Արտուշ Պետրոսյանի մրցակիցը կլինի ամերիկացի Կուպեր Մեթյուզը։

Ջանես Նազարյանը մինչև 71 կգ քաշային կարգում իր առաջին գոտեմարտը կանցկացնի Նորվեգիայի ներկայացուցիչ Մարտին Լեթվիկի դեմ։

Մինչև 92 կգ քաշային կարգի 1/8 եզրափակչում Ալեքսան Շալջյանի մրցակիցը կորոշվի բուլղարացի Ֆիլի Դուրևի և թուրք Յուսուֆ Աքսուի գոտեմարտում։

Երեք հայ ըմբիշներ պահպանում են բրոնզե մեդալ նվաճելու հնարավորությունը

Մրցումների առաջին օրը Հայաստանը նույնպես ներկայացնում էին հինգ ըմբիշներ։ Նրանցից երեքը շարունակում են պայքարը բրոնզե մեդալների համար։

Մինչև 48 կգ քաշային Արարատ Ավետիսյանը և մինչև 65 կգ քաշային Վագեն Մնացականյանը հնարավորություն են ստացել մասնակցելու բրոնզե մեդալի համար գոտեմարտերին։ Մինչև 110 կգ քաշային Խաչիկ Խաչիկյանը կփորձի երրորդ տեղի համար պայքարին հասնել սփոփիչ գոտեմարտերի միջոցով։

Հայ ըմբիշները մի քանի դիտարժան և լարված գոտեմարտ անցկացրին։ Հատկապես աչքի ընկան Արարատ Ավետիսյանն ու Վագեն Մնացականյանը, որոնք բնավորություն դրսևորեցին և բարդ իրավիճակներում կամային հաղթանակներ տարան։ Վաղը նրանք կպայքարեն բրոնզե մեդալների համար։

Եվրոպայի չեմպիոն Վահե Հովեյանը վստահ սկսեց մրցաշարը, սակայն այնուհետև զիջեց Լիտվայի ուժեղ ներկայացուցչին։ Չնայած պարտությանը՝ այս տարին արդեն հաջողված կարելի է համարել հայ ըմբիշի համար։ Բացի այդ, տարիքը թույլ կտա Օվեյանին հաջորդ տարի ևս հանդես գալ Մ17 տարիքային խմբում։