«Ցավալի է արդյունքի համար». Վահե Գևորգյանը մեկնաբանել է «Ալաշկերտի» ոչ-ոքին ՉՖՌ Կլուժի հետ

«Ալաշկերտի» գլխավոր մարզիչ Վահե Գևորգյանը մեկնաբանել է ռումինական ՉՖՌ Կլուժի հետ ոչ-ոքին ՈՒԵՖԱ-ի Կոնֆերենցիաների լիգայի որակավորման երկրորդ փուլի առաջին խաղում։ Երևանում կայացած հանդիպումն ավարտվել է 1:1 հաշվով։ Հայկական թիմի մարզիչը խոսել է չիրացված պահերի, բաց թողած գոլի պատճառների և պատասխան խաղից առաջ թիմի տրամադրվածության մասին։

Վահե Գևորգյանի մամուլի ասուլիսը «Ալաշկերտ» — ՉՖՌ Կլուժ՝ 1:1 խաղից հետո

— Խաղն ավարտվեց ոչ-ոքի, թեև «Ալաշկերտն» ուներ խաղային առավելություն։ Համաձա՞յն եք, որ արդյունքը լիովին չի արտացոլում հանդիպման ընթացքը։ Ինչպիսի՞ տրամադրություն է հիմա հանդերձարանում։

— Համաձայն եմ։ Ցավալի է, որ խաղն ավարտվեց ոչ-ոքի։ Մենք գիտեինք, որ մրցակիցը շատ փորձառու և բարձրակարգ է, հասկանում էինք, որ ցանկացած սխալի համար կարող են պատժել մեզ։ Բայց սա ֆուտբոլ է, և ունենք այն, ինչ ունենք։

Թե ինչ տրամադրություն է հիմա թիմում, դեռ չգիտեմ․ սովորաբար ֆուտբոլիստների մոտ հանդերձարան մի փոքր ուշ եմ մտնում։ Անձամբ ես զայրացած եմ արդյունքի պատճառով, սակայն հասկանում եմ, որ այժմ պետք է հնարավորինս արագ վերականգնել խաղացողներին և պատրաստվել պատասխան հանդիպմանը։

— Մենք տեսանք երկու տարբեր խաղակեսեր․ առաջինում «Ալաշկերտն» ուներ զգալի առավելություն, իսկ երկրորդում վտանգավոր պահերն ավելի քիչ էին։ Ինչո՞վ էր դա պայմանավորված։

— Այդպես զարգացավ խաղի սցենարը։ Կարծում եմ՝ առաջին խաղակեսում ՉՖՌ Կլուժի ֆուտբոլիստները մեզանից նման խաղ չէին սպասում և չկարողացան դիմակայել մեր գրոհներին։ Ընդմիջումից հետո մրցակիցը սկսեց ավելի զգույշ գործել և ավելի մեծ ուշադրություն դարձնել պաշտպանությանը։

Չպետք է մոռանալ, որ մենք խաղում էինք ոչ թե սիրողական թիմի, այլ շատ լուրջ և ուժեղ մրցակցի դեմ։ Միևնույն ժամանակ կարծում եմ, որ երկրորդ խաղակեսում ևս առավելություն ունեինք։ Իհարկե, բաց թողած գոլն ազդեց թիմի վրա, բայց փոխարինումներից հետո հանդիպման վերջնամասում բազմաթիվ պահեր ստեղծեցինք։

— Երկրորդ խաղակեսի սկզբում թիմը շատ արագ գոլ բաց թողեց։ Դա կենտրոնացման կորստի՞ հետևանք էր։

— Այո, պատճառը հենց խաղակեսի սկզբում կենտրոնացման կորուստն էր։ Մենք բոլորովին անհարկի գոլ բաց թողեցինք․ սխալվեցինք գնդակը եզրային նետումից խաղի մեջ մտցնելուց հետո և մրցակցին թույլ տվեցինք հավասարեցնել հաշիվը։

— Սովորաբար մարզչի համար լուրջ խնդիր է, երբ թիմը գոլային պահեր չի ստեղծում։ «Ալաշկերտը» բավականաչափ պահեր է ստեղծում, բայց դժվարություններ ունի դրանք իրացնելու հարցում։ Ինչպե՞ս կարելի է դա շտկել։

— Կարծում եմ՝ դա կապված է հոգեբանության, երիտասարդության և որոշ ֆուտբոլիստների փորձի պակասի հետ։ Խաղացողների վրա նաև ճնշումն է ազդում․ մենք ցանկանում ենք հնարավորինս լավ հանդես գալ, բայց երբեմն այդ ցանկությունը խանգարում է նրանց ազատ գործել։

Մարզումների ժամանակ փորձում ենք աշխատել պահերի իրացման վրա։ Գոլային իրավիճակներում ֆուտբոլիստները պետք է հանգստություն պահպանեն և վստահ լինեն իրենց ուժերին։

— Հակոբ Հակոբյանի վիճակի մասին տեղեկություն կա՞։

— Առայժմ հստակ տեղեկություն չկա, բայց կարծում եմ՝ լուրջ բան տեղի չի ունեցել։

— Մարզադաշտում շատ ռումինացի երկրպագուներ կային, որոնք ժամանակ առ ժամանակ ավելի բարձր էին վանկարկում, քան տեղացի երկրպագուները։ Դա որևէ կերպ ազդե՞ց ֆուտբոլիստների վրա։

— Կարծում եմ՝ երկրպագուների աջակցությունը միշտ կարևոր է և ազդում է թիմի խաղի վրա։

«Ալաշկերտն» ու ՉՖՌ Կլուժը ոչ-ոքի խաղացին՝ 1:1։ Հայկական թիմը հաշիվը բացեց 35-րդ րոպեին․ Կարեն Նալբանդյանի փոխանցումից հետո աչքի ընկավ Ռաֆայել Ժեզուսը։ 47-րդ րոպեին Անդրես Սֆայթը վերականգնեց հավասարությունը։ Պատասխան հանդիպումը կկայանա հուլիսի 30-ին Կլուժ-Նապոկայում։