Մխիթարյանը մոտ է «Ինտերի» հետ պայմանագրի երկարաձգմանը

Հենրիխ Մխիթարյանը, ամենայն հավանականությամբ, կշարունակի ելույթները Միլանի «Ինտերում»։ Sky Sport-ի տեղեկություններով՝ հայ կիսապաշտպանը համաձայնել է երկարաձգել պայմանագիրը ակումբի հետ և պատրաստ է աշխատավարձի կրճատման։

Ըստ աղբյուրի՝ խոսքը 1+1 ձևաչափով համաձայնագրի մասին է․ պայմանագիրը կերկարաձգվի մեկ մրցաշրջանով՝ հետագայում ամեն տարի երկարաձգելու հնարավորությամբ։ Այսպիսով, Մխիթարյանը կարող է մնալ «ներաձուրիների» կազմում առնվազն ևս մեկ տարի։

Հնարավոր երկարաձգման մասին տեղեկությունը հաստատել է նաև հայտնի ինսայդեր Ջանլուկա Դի Մարցիոն։ Նրա տվյալներով՝ «Ինտերի» գլխավոր մարզիչ Քրիստիան Կիվուն կարողացել է համոզել Մխիթարյանին ևս մեկ մրցաշրջան շարունակել կարիերան միլանյան ակումբում։ Միևնույն ժամանակ նոր համաձայնագրի մանրամասները, այդ թվում՝ աշխատավարձի վերանայումը, կողմերը պետք է քննարկեն առաջիկա օրերին։

Ավելի վաղ 37-ամյա հայ ֆուտբոլիստի ապագան անորոշ էր մնում։ Մրցաշրջանի եզրափակիչ խաղից հետո՝ «Բոլոնիայի» դեմ հանդիպումից հետո, Կիվուն արդեն խոսել էր Մխիթարյանի կարևորության մասին թիմի համար՝ ընդգծելով նրա պրոֆեսիոնալիզմը, աշխատանքի նկատմամբ վերաբերմունքը և ազդեցությունը հանդերձարանում։

Ինքը՝ Մխիթարյանը, մրցաշրջանն ավարտում էր առանձնահատուկ կարգավիճակով․ «Բոլոնիայի» դեմ խաղում նա խաղադաշտ դուրս եկավ երկրորդ խաղակեսում և հանդիպումն ավարտեց ավագի թևկապով։ Այդ պահին չէր բացառվում, որ այդ խաղը կարող էր նրա համար վերջինը լինել պրոֆեսիոնալ կարիերայում։

Այժմ իրավիճակը փոխվել է։ Եթե կողմերը վերջնականապես համաձայնեցնեն նոր պայմանագրի պայմանները, Մխիթարյանը կշարունակի կարիերան Իտալիայի և Եվրոպայի ուժեղագույն ակումբներից մեկում։

Հենրիխ Մխիթարյանը «Ինտերում» հանդես է գալիս 2022 թվականից։ Միլանյան ակումբում անցկացրած ժամանակահատվածում նա դարձել է թիմի ամենափորձառու և կարևոր ֆուտբոլիստներից մեկը, օգնել է «ներաձուրիներին» նվաճել վեց տիտղոս, այդ թվում՝ Ա Սերիայի չեմպիոնական տիտղոսներ։ Հայկական ֆուտբոլի համար Մխիթարյանի՝ «Ինտերի» հետ հնարավոր երկարաձգումը կարևոր նորություն կլինի․ երկրի պատմության լավագույն ֆուտբոլիստներից մեկը կշարունակի հանդես գալ ամենաբարձր մակարդակում։