M4 Sport․ VAR-ի բացակայությունը «Դեբրեցենին» փրկեց «Փյունիկի» դեմ խաղում պարտությունից
- Հեղինակ: Vahe Hakobyan
- Sportaran
Հունգարական M4 Sport լրատվամիջոցը կարծում է, որ տեսակրկնությունների համակարգի բացակայությունը կարող էր «Դեբրեցենին» փրկել «Փյունիկի» դեմ Կոնֆերենցիաների լիգայի որակավորման փուլի պատասխան խաղում պարտությունից։
Երևանում կայացած հանդիպումն ավարտվեց 0։0 հաշվով, սակայն դրվագներից մեկը հարցեր է առաջացրել հունգարացի լրագրողների մոտ։ «Փյունիկի» ֆուտբոլիստները գրավել էին մրցակցի դարպասը, սակայն մրցավարները խաղից դուրս վիճակ արձանագրեցին և չհաշվեցին գոլը։
M4 Sport-ը նշում է, որ դանդաղեցված կրկնապատկերում երևում է՝ գնդակը «Փյունիկի» ֆուտբոլիստին է հասել «Դեբրեցենի» պաշտպան Ադամ Լանգի գլխից անդրադառնալուց հետո։
«Դանդաղեցված կրկնապատկերից դատելով՝ գնդակը Ադամ Լանգի գլխից անդրադարձել և հասել է “Փյունիկի” ֆուտբոլիստին։ Մրցավարի օգնականը կամ պատշաճ կերպով չի նկատել դա, կամ համարել է, որ հետևում գտնվող հայ հարձակվողը միջամտել է դրվագին և ազդել Լանգի գործողությունների վրա։ Ինչ էլ որ տեղի ունեցած լինի, “Դեբրեցենի” տեսանկյունից VAR-ի բացակայությունն այս խաղում խնդիր չէր։ Միանգամայն հնարավոր է, որ տեսաօգնականները խորհուրդ տային վերանայել որոշումը, որից հետո գլխավոր մրցավարը կարող էր հաշվել գոլը», — գրում է հունգարական լրատվամիջոցը։
«Փյունիկ» — «Դեբրեցեն» հանդիպումն ավարտվեց գոլազուրկ ոչ-ոքիով։ Առաջին խաղում տարած հաղթանակի շնորհիվ հունգարական թիմը դիմակայությունում առավելության հասավ ընդհանուր 1։0 հաշվով և դուրս եկավ Կոնֆերենցիաների լիգայի հաջորդ փուլ։