Ինչպես են հայ ֆուտբոլիստները հանդես եկել Ռուսաստանի Առաջին լիգայի 2026/27 մրցաշրջանի առաջին տուրում
- Հեղինակ: Vahe Hakobyan
- Sportaran
Անցած շաբաթ մեկնարկել է Ռուսաստանի Առաջին լիգայի 2026/27 մրցաշրջանը։ Մրցաշարում ավանդաբար հանդես են գալիս Հայաստանի հետ կապված բազմաթիվ ֆուտբոլիստներ։
Նրանց թվում են Հայաստանի ազգային հավաքականի նախկին ֆուտբոլիստներ Խորեն Բայրամյանն ու Արտյոմ Սիմոնյանը, ազգային թիմի գործող խաղացողներ Դավիթ Դավիդյանն ու Տիգրան Ավանեսյանը, ինչպես նաև Հայաստանի երիտասարդական հավաքականի կիսապաշտպան Դավիթ Կիրակոսյանը։ Սակայն Ավանեսյանի շուրջ իրավիճակն առայժմ անորոշ է։ Նա «Օրենբուրգից» վարձակալությունից հետո վերադարձել է, սակայն Տուլայի «Արսենալը» դեռ չի հայտավորել նրան նոր մրցաշրջանի համար։
Առաջին լիգայում կարիերան շարունակում են նաև Արթուր Գալոյանը, Պավել Գորելովը և Արտյոմ Գյուրջյանը, որոնք նախկինում հրավիրվել են Հայաստանի հավաքական, սակայն դեռ չեն կարողացել ամրապնդվել ազգային թիմի կազմում։
Բացի այդ, մրցաշարում հանդես են գալիս հայկական ծագում ունեցող ֆուտբոլիստներ, որոնք նախկինում չեն հրավիրվել Հայաստանի ազգային կամ երիտասարդական հավաքականներ, սակայն ապագայում կարող են հայտնվել մարզչական շտաբի ուշադրության կենտրոնում՝ Գարիկ Լևինը, Միհրան Աղեյանը, Վալերի Ծառուկյանը և Տիգրան Արաբաչյանը։
Ինչպես են հայ ֆուտբոլիստները հանդես եկել առաջին տուրում
«Ուֆայի» հարձակվող Միհրան Աղեյանը «Լենինգրադեցի» դեմ խաղում փոխարինման է դուրս եկել 61-րդ րոպեին։ Նրա թիմը վստահ հաղթանակ է տարել 3։0 հաշվով։
«Ենիսեյի» պաշտպան Արտյոմ Գյուրջյանը Ուլյանովսկի «Վոլգայի» դեմ հանդիպման 66-րդ րոպեին է դուրս եկել խաղադաշտ։
Տուրի ամենաարդյունավետ հայ ֆուտբոլիստներից մեկը դարձել է «Ռոտորի» կիսապաշտպան Արտյոմ Սիմոնյանը։ «Պարի ՆՆ»-ի դեմ խաղում նա անցկացրել է 75 րոպե և կատարել երկու գոլային փոխանցում, սակայն Վոլգոգրադի թիմը պարտվել է 2։4 հաշվով։
«Ռոտորի» մեկ այլ ֆուտբոլիստ Պավել Գորելովը խաղի մեջ է մտել 60-րդ րոպեին։ «Պարի ՆՆ»-ի կիսապաշտպան Վալերի Ծառուկյանը մնացել է պահեստայինների նստարանին։
Հայաստանի երիտասարդական հավաքականի ֆուտբոլիստ Դավիթ Կիրակոսյանը, որը վերջերս է տեղափոխվել Կոստրոմայի «Սպարտակ», ԿԱՄԱԶ-ի դեմ հանդիպումն անցկացրել է պահեստայինների նստարանին։ Նրա նոր թիմը հաղթել է 3։1 հաշվով։
«Ուրալի» կիսապաշտպան Խորեն Բայրամյանը Մոսկվայի «Տորպեդոյի» դեմ խաղում իր նոր թիմին խաղադաշտ է դուրս բերել ավագի թևկապով և անցկացրել 70 րոպե։ Եկատերինբուրգի ակումբը պարտվել է 0։1 հաշվով։
Տիգրան Արաբաչյանը մնացել է «Ուրալի» պահեստայինների նստարանին, իսկ «Տորպեդոյի» կիսապաշտպան Արթուր Գալոյանը փոխարինման է դուրս եկել 59-րդ րոպեին։
«Չելյաբինսկի» ավագ Գարիկ Լևինը ամբողջությամբ մասնակցել է ՍԿԱ-Խաբարովսկի դեմ հանդիպմանը։ Նրա թիմը հաղթել է 3։1 հաշվով։
Հայաստանի հավաքականի ֆուտբոլիստ Դավիթ Դավիդյանը Տուլայի «Արսենալի» կազմում «Տեքստիլշչիկի» դեմ հանդիպման 77-րդ րոպեին է դուրս եկել խաղադաշտ։ Տուլայի թիմը հաղթել է 2։1 հաշվով։
«Արսենալի» մեկ այլ հայ կիսապաշտպան Տիգրան Ավանեսյանը չի ընդգրկվել հանդիպման հայտացուցակում։ Այս պահին ֆուտբոլիստը նաև հայտավորված չէ Առաջին լիգայի նոր մրցաշրջանին մասնակցելու համար։