Իսպանիան հաղթեց Արգենտինային և պատմության մեջ երկրորդ անգամ դարձավ աշխարհի չեմպիոն

Իսպանիայի ազգային հավաքականը նվաճեց 2026 թվականի աշխարհի առաջնության չեմպիոնի տիտղոսը։ Մրցաշարի եզրափակիչ խաղում «Կարմիր ֆուրիան» 1:0 հաշվով հաղթեց Արգենտինային և պատմության մեջ երկրորդ անգամ բարձրացրեց աշխարհի գլխավոր ֆուտբոլային գավաթը։

Եզրափակիչ հանդիպումը կայացավ «Նյու Յորք Նյու Ջերսի» մարզադաշտում և ավարտվեց իսպանացիների հաղթանակով լրացուցիչ ժամանակում։ Խաղի գլխավոր հերոսը հարձակվող Ֆերրան Տորեսն էր, որը խփեց վճռորոշ գոլը և իր թիմին բերեց պատմության երկրորդ աշխարհի չեմպիոնական տիտղոսը։

Առաջին անգամ Իսպանիան աշխարհի չեմպիոն դարձել էր 2010 թվականին Հարավային Աֆրիկայում, երբ եզրափակիչում հաղթեց Նիդերլանդներին՝ Անդրես Ինիեստայի լեգենդար գոլի շնորհիվ։ 16 տարի անց Իսպանիայի հավաքականը կրկին հայտնվեց համաշխարհային ֆուտբոլի գագաթին։

Արգենտինայի դեմ եզրափակիչի հաղթական գոլը գրանցվեց լրացուցիչ ժամանակում։ Պեդրո Պորրոն փոխանցում կատարեց տուգանային հրապարակ, Նիկո Ուիլյամսը հաղթեց օդային պայքարում և գնդակը հասցրեց Տորեսին, որը հզոր հարվածով այն ուղարկեց դարպասի վերին անկյուն՝ 1:0։

Արգենտինան չկարողացավ պատասխանել այդ գոլին և ավարտեց մրցաշարը՝ դառնալով արծաթե մեդալակիր։ 92-րդ րոպեից Լիոնել Սկալոնիի թիմը խաղում էր 10 ֆուտբոլիստով՝ Էնցո Ֆերնանդեսի հեռացումից հետո, որը ստացել էր երկրորդ դեղին քարտը։

Իսպանիան ամբողջությամբ վերահսկում էր խաղի ընթացքը և ուներ վիճակագրական մեծ առավելություն։ Լուիս դե լա Ֆուենտեի սաները կատարել են 20 հարված դարպասին, որոնցից 12-ը՝ դիպուկ։ Արգենտինան ամբողջ խաղի ընթացքում ընդամենը երկու անգամ է հարվածել Իսպանիայի դարպասին և ոչ մի անգամ չի դիպել նշակետին։

Այսպիսով, Իսպանիայի հավաքականը դարձավ աշխարհի կրկնակի չեմպիոն, իսկ Ֆերրան Տորեսը պատմության մեջ մտավ որպես ԱԱ-2026-ի եզրափակիչի հաղթական գոլի հեղինակ։

Աշխարհի առաջնություն-2026. Եզրափակիչ

Իսպանիա — Արգենտինա — 1:0

Գոլ՝
1:0 — Ֆերրան Տորես, 103-րդ րոպե։