Գրանտ-Լեոն Ռանոսը կարիերան կշարունակի իսպանական «Տեներիֆեում»
- Հեղինակ: Vahe Hakobyan
- Sportaran
Հայաստանի ազգային հավաքականի հարձակվող Գրանտ-Լեոն Ռանոսը մոտ է Մյոնխենգլադբախի «Բորուսիայից» իսպանական Լա Լիգա 2-ը ներկայացնող «Տեներիֆե» տեղափոխվելուն։
Ակումբները լիարժեք համաձայնության են հասել 22-ամյա ֆուտբոլիստի մշտական տրանսֆերի շուրջ։ Ըստ առկա տեղեկությունների՝ «Տեներիֆեն» Ռանոսի համար կվճարի 300 հազար եվրո։ Գործարքը նախատեսում է նաև հավելավճարներ և ֆուտբոլիստի հետագա վաճառքից գերմանական ակումբին հասանելիք զգալի տոկոս։
Ռանոսն իսպանական ակումբի հետ պայմանագիր կկնքի մինչև 2028 թվականի ամառ։ Համաձայնագրում նախատեսված կլինի ևս մեկ մրցաշրջանով երկարաձգման հնարավորություն, եթե «Տեներիֆեն» բարձրանա Իսպանիայի առաջնության բարձրագույն դիվիզիոն։
Սպասվում է, որ Հայաստանի հավաքականի հարձակվողը մոտ ժամանակներս կմիանա նոր թիմին և կսկսի նախապատրաստվել մրցաշրջանին։
Ռանոսի տրանսֆերային իրավունքները պատկանում են Մյոնխենգլադբախի «Բորուսիային»։ Անցած մրցաշրջանում հարձակվողը վարձակալությամբ հանդես էր գալիս Բրաունշվայգի «Այնտրախտում»։
Իսպանիա տեղափոխվելը նոր փուլ կդառնա Հայաստանի հավաքականի ֆուտբոլիստի կարիերայում։ Ռանոսը հույս ունի ավելի շատ խաղաժամանակ ստանալ և ամրապնդվել «Տեներիֆեի» կազմում։