Գեորգի Հարությունյանը խփել է իր առաջին գոլը «Պուշկաշ Ակադեմիայի» կազմում

Հայաստանի ազգային հավաքականի պաշտպան Գեորգի Հարությունյանը խփել է իր առաջին գոլը հունգարական «Պուշկաշ Ակադեմիայի» կազմում։

Հունգարիայի առաջնության երրորդ տուրում ՄՏԿ-ի դեմ խաղում 21-ամյա ֆուտբոլիստը խփել է իր թիմի երկրորդ գոլը՝ հաշիվը դարձնելով 2:0։

ՄՏԿ-ին հաջողվել է վերականգնել հավասարակշռությունը, սակայն վերջին խոսքը մնացել է «Պուշկաշ Ակադեմիային»։ 97-րդ րոպեին Կոլլին խփել է հաղթական գոլը՝ իր թիմին պարգևելով 3:2 հաշվով հաղթանակ։

Հարությունյանն անցկացրել է ամբողջ հանդիպումը և SofaScore վիճակագրական հարթակից ստացել 7,8 գնահատական։

Հայ պաշտպանն արդյունավետ է գործել նաև պաշտպանությունում։ Նրա հաշվին գրանցվել է 2 խլում, 1 ընդհատում, գնդակի 5 հեռացում, գնդակի 3 վերադարձ և 2 արգելափակում։ Բացի այդ, Հարությունյանը հաղթել է բոլոր 4 օդային մենապայքարներում և ընդհանուր 4 մենապայքարից 3-ում։